Oralda kópbeıindi oblystyq balalar aýrýhanasynyń dárigerleri balaǵa ota jasady. Onyń asqazanynan shashtyń úlken shoǵyry tabyldy. Trıhobezoar dep atalatyn bógde túzilimniń salmaǵy shamamen bir kelige jetti, dep habarlaıdy infohub.kz saıty.
Aıtýlarynsha, shash shoǵyryn dárigerler tekserý barysynda anyqtaǵan. Túzilimniń mólsheri men tyǵyzdyǵyna baılanysty mamandar tolyq hırýrgıalyq aralasýǵa májbúr boldy — ony endoskopıalyq jolmen alý múmkin bolmady.
Trıhobezoar — óziniń nemese bóten adamnyń shashyn únemi jutý ádetinen (trıhofagıa) asqazanda paıda bolatyn tyǵyz shash shoǵyry. Bul patologıa kóbinese balalar men jasóspirimderde kezdesedi.
Ata-analarǵa birqatar alańdatarlyq belgilerge nazar aýdarýǵa keńes beriledi: ishtiń joǵarǵy bóligindegi aýyrsyný men aýyrlyq, júrek aıný jáne qusý, tábettiń tómendeýi, tamaq jegende tez toıý jáne salmaq joǵaltý. Sondaı-aq aýyzdan jaǵymsyz ıistiń shyǵýy jáne ish aımaǵynda sıpap seziletin tyǵyzdalý da alańdatýy tıis.
«Shash shoǵyry sonshalyqty ósip, asqazannan on eki eli ishekke jáne ashshy ishekke óte bastaǵanda, bul jaǵdaıdy "Rapýnsel sındromy" dep ataıdy. Ol ishek tuıyqtalýy, ishki qan ketý, tipti asqazan qabyrǵasynyń jarylýy sıaqty asqynýlarymen ólimge ákelýi múmkin», — deıdi dárigerler.
Patologıa fıbrogastrodýodenoskopıa (FGDS), sondaı-aq últradybystyq zertteý jáne kompúterlik tomografıa arqyly anyqtalady. Shashtyń shaǵyn shoǵyryn keıde endoskopıalyq jolmen alýǵa bolady, al asqynǵan jaǵdaıda tek hırýrgıalyq ota kómektesedi.
Hırýrgıalyq emnen keıin naýqastarǵa mindetti túrde balalar psıhologynyń nemese psıhıatrdyń kómegi qajet, óıtkeni shash jeý ádeti emosıonaldyq buzylystarmen jáne minez-qulyq buzylystarymen baılanysty.