Oralda polıseı ashyq terezeniń aldynda turǵan kishkentaı balany baıqap, qaıǵyly oqıǵanyń aldyn aldy. Jangır han kóshesindegi kópqabatty úıdiń turǵyndary shamamen 3-4 jastaǵy balany kórip, dereý polısıa qyzmetkerine habarlady, dep habarlaıdy infohub.kz saıty.
Oqıǵa ornyna «Shaǵan» polısıa bóliminiń ýchaskelik ınspektory Ýbısh Gaısın jedel jetti. Balany ashyq terezeniń janynan kórgen polıseı ony birden qaýipsiz jerge alyp ketti.
Tekserý barysynda balanyń anasy óz isimen úıden shyǵyp ketkeni, ony 14 jastaǵy úlken aǵasynyń qaraýyna qaldyrǵany anyqtaldy. Úlken aǵasy uıyqtap jatqanda, bala ashyq terezeniń aldyna baryp, syrtqa qarap turǵan. Polısıa qyzmetkeriniń jyldam ári durys áreketiniń arqasynda balanyń ómiri men densaýlyǵyna tóngen qaýiptiń aldyn alý múmkin boldy.
Oqıǵadan keıin balanyń ata-anasymen profılaktıkalyq áńgime júrgizildi. Olarǵa balalardy qaraýsyz qaldyrýǵa bolmaıtyny jáne olardyń qaýipsizdigin qamtamasyz etý qajettigi túsindirildi. Polısıa barlyq ata-analardy balalaryna muqıat bolýǵa jáne ashyq terezelerdiń qaýip tóndirýine jol bermeýge shaqyrady.