Oralda Uly Otan soǵysynyń ardageri, 1945 jylǵy Jeńis sherýine qatysqan, «Halyq Qaharmany» ataǵyn alǵan Ivan Stepanovıch Gapıch 103 jasynda ómirden ótti, dep habarlaıdy infohub.kz.
Ivan Gapıch 1941 jyly maıdanǵa óz erkimen attanyp, búkil soǵysty baılanysshy bolyp ótken. Ol Ýkraınany, Belarýsti, Polshany jáne Chehoslovakıany azat etýge qatysyp, Kenıgsbergke deıin jetken. Kórsetken erligi men qaharmandyǵy úshin İİİ dárejeli Dańq ordeni, İİ dárejeli Otan soǵysy ordeni, Qyzyl Juldyz ordeni jáne basqa da memlekettik nagradalarmen marapattalǵan.
Onyń ómirbaıanynda erekshe oryn alatyny — 1945 jyly 24 maýsymda Qyzyl alańda ótken tarıhı Jeńis sherýine qatysýy. 2023 jyly Ivan Stepanovıchke Qazaqstan Respýblıkasynyń eń joǵary ataǵy — «Halyq Qaharmany» berildi.
Oraldaǵy Orys úıinde Ivan Stepanovıch qyzmetkerler úshin tek ańyzǵa aınalǵan ardager ǵana emes, sonymen birge kóp jyldar boıy jyly qarym-qatynasta bolǵan adam ekenin atap ótti.
«Ony merekelermen jáne Jeńis kúnimen quttyqtaý, qonaqqa barý, onyń estelikterin tyńdaý, onyń óshpes ómirlik kúshin, danalyǵy men izgi nıetin kórý biz úshin úlken mártebe edi», — delingen habarlamada.
Uıym Ivan Stepanovıchtiń týǵan-týystary men jaqyndaryna qaıǵyra kóńil aıtyp, ol týraly jarqyn estelik ony biletinderdiń júreginde máńgi saqtalatynyn atap ótti.