«Ordabasy» qaqpashysy Bekhan Shaızada Qazaqstan Premer-lıgasynyń 18-týrynda «Elımaıdy» jeńý týraly áserimen bólisip, chempıondyq úshin kúres komandaǵa mańyzdy jetistikterden keıin de bosańsýǵa múmkindik bermeıtinin atap ótti, dep habarlaıdy infohub.kz saıty.
«Biz úshin árbir oıyn ońaıǵa soqpaıdy, óıtkeni chempıondyq úshin kúres kezinde qateniń baǵasy óte joǵary. Sondyqtan qazir árbir mach fınal sekildi. Jańa kelgen oıynshylarǵa kelsek, olar dál pastar men goldarmen oıynymyzǵa úles qosyp jatyr dep oılaımyn. «Elımaı» eýrokýbokterde oınady, sondyqtan olar bizge baıypty daıyndalǵan dep esepteımin. Alda «Kaıratpen» oıyn kútip tur, biz jeńiske baǵyttalǵan bolamyz», – dedi Shaızada Sports24.kz-ke bergen suhbatynda.
Keshe shymkenttik klýb Semeı komandasyn 3:1 esebimen jeńip, týrnır kestesinde qaıtadan birinshi orynǵa kóterilip, «Kaırattan» ozyp ketti. «Ordabasy» sapynda Born Ionsen, Gı-Marselen Kılama jáne penaltıdi dál oryndaǵan Elhan Astanov gol soqty.
Odan bir kún buryn «Kaırat» «Atyraýdy» jeńip, ýaqytsha birinshi orynǵa kóterildi. Mach Túrkistanda ótip, 3:1 esebimen almatylyqtardyń paıdasyna aıaqtaldy. «Kaırat» sapynda Edmılson dúbl jasasa, taǵy bir gol Frano Prseniń avtogolynan soǵyldy.
Kelesi týrda «Ordabasy» syrt alańda «Kaıratpen» kezdesedi. Almatydaǵy bul oıyn KPL kestesiniń joǵarǵy bóligindegi oryndardyń bólinýine tikeleı áser etýi múmkin.