AQSH-tyń Oregon shtatyndaǵy aýyldyq jerde bes adamdy óltirdi degen kúdikke ilingen er adam óz-ózine qol jumsaǵan kúıinde tabyldy. Bul týraly jergilikti quqyq qorǵaý organdary jeksenbi kúni habarlady. Oqıǵa Portlendten shamamen 48 shaqyrym jerdegi Forest-Groýv mańyndaǵy aýyldyq qaýymdastyqta bolǵan. Polısıaǵa kólik órti týraly habarlama túskennen keıin, senbi kúni úıden bes adamnyń denesi tabylǵan. Sonymen qatar, úıde birneshe úı janýarlarynyń da óli deneleri anyqtalǵan.
Vashıngton okrýginiń sherıf keńsesi 36 jastaǵy Bendjamın Charlz Parkerdi kúdikti dep atady. Ol Sıetlden shamamen 72 shaqyrym jerdegi Vashıngton shtatynyń Enýmklo qalasynda óz kóliginde óli kúıinde tabylǵan. Ol óz-ózine qol jumsaǵan dep boljanýda. Vashıngton okrýginiń sherıfi Keprıs Messı: «Osy jerdegi 22 jyldyq tájirıbemde mundaı kúrdeli oqıǵanyń kýási bolǵan emespin», — dedi.
Tergeýshiler bul qylmystyń kezdeısoq zorlyq-zombylyq emes ekenin aıtty, biraq egjeı-tegjeıin ashpady. Qurbandardyń jasy men jynysy, ólim sebepteri jáne olardyń arasyndaǵy baılanys týraly dereý jarıalanbady. Sherıf keńsesiniń tergeýshisi Shennon Ýaıld jeksenbi kúngi baspasóz máslıhatynda qurbandardyń kim ekenin anyqtaý áli jalǵasyp jatqanyn aıtty. «Bir adamnyń qazasy — logıstıkalyq qıyndyq, al beseýi — odan da kúrdeli», — dedi Ýaıld.
Jýrnalıserdiń ólikter tabylǵannan keıin aqparattyń kesh jarıalanýyna qatysty suraǵyna Ýaıld, aldymen qurbandardyń jeke basyn anyqtap, týystaryna habarlaý qajet bolǵanyn, sodan keıin ǵana baspasóz máslıhatyn ótkizgenderin túsindirdi. Ol sondaı-aq tergeýdiń «óte belsendi jáne kóp qyrly» ekenin, aqparattyń dáldigin qamtamasyz etý mańyzdy ekenin atap ótti.
Qarýly zorlyq-zombylyq muraǵatynyń (Gun Violence Archive) derekterine sáıkes, bıyl AQSH-ta keminde 16 jappaı kisi óltirý oqıǵasy tirkelgen. Bul uıym tórt nemese odan da kóp adamnyń ólimimen aıaqtalǵan oqıǵalardy jappaı kisi óltirý dep sanaıdy. Bul oqıǵa 7 tamyzdan beri AQSH-taǵy tórtinshi jappaı kisi óltirý boldy.