Origin Energy kompanıasyna jasalǵan hakerlik shabýyl saldarynan 900 myńǵa jýyq qazirgi jáne burynǵy klıenttiń jeke málimetine qol jetkizilgeni anyqtaldy, dep habarlaıdy infohub.kz.
Avstralıadaǵy eń iri energıa satýshy kompanıa bul shabýyl týraly klıentterge habarlaýdan úsh apta buryn eskertilgenin moıyndady. Qol jetkizilgen 900 myń derektiń basym bóligi burynǵy klıentterge tıesili, zardap shekkender aldaǵy kúnderi habarlandyrý alady.
Qol jetkizilgen derekterge klıentterdiń aty-jóni, mekenjaıy, týǵan kúni, telefon nómiri, eseptik jazba aqparaty, sondaı-aq nesıe kartasynyń sońǵy tórt sany nemese banktik shottyń sońǵy úsh sany kirýi múmkin.
Kompanıanyń bas dırektory Frenk Kalabrıa jýrnalıserge oqıǵa áli de zerttelip jatqanyn aıtty. «Keshirim suraımyz, — dedi ol seısenbide. — Klıentterdiń Origin-ge degen senimin jeńil qabyldamaımyz jáne olarǵa qoldaý kórsetýge daıynbyz». Ol klıentterdi kúdikti áreketter men alaıaqtyq qaýpiniń artýyna saq bolýǵa shaqyrdy.
Kalabrıa kompanıanyń 2 shildede klıentterdiń jazbalaryna qol jetkizgen bireýden elektrondyq hat alǵanyn, biraq derekterge qol jetkizý dáleldenbegendikten, bul qaýipti shynaıy dep baǵalamaǵanyn aıtty. 22 shildede derekterge qol jetkizý dáleli kelgen soń, kompanıa shabýyl týraly habarlady.
Kalabrıa «tarıhı derekterge» «ruqsatsyz» qol jetkizilgenin jáne kompanıanyń osyǵan uqsas oqıǵalardyń aldyn alý úshin júıeni qaýipsizdendirý jumystaryn júrgizgenin málimdedi. Onyń aıtýynsha, kompanıa aqparattyń qarańǵy ınternetke ornalastyrylǵanyna senbeıdi.
Kalabrıa shabýyldyń qashan bolǵany, kompanıa qyzmetkerleriniń qatysy bar-joǵy, tólem talap etilgeni nemese tólengeni, aqparattyń aǵyp ketý qaýpi áli de bar ma degen suraqtarǵa jaýap berýden bas tartty. «Bul — belsendi tergelip jatqan qylmystyq is, sondyqtan qazir aqparat berý shekteýli», — dedi ol.
Kompanıa ótken aptada The Australian gazetiniń hakermen derekterdi jarıalamaý týraly kelisimge kelgeni jónindegi habaryn joqqa shyǵardy. «Origin qazirgi ýaqytta derekter qaýipsizdigi oqıǵasyn belsendi basqaryp jatyr. Bizdiń tergeýimiz jalǵasýda, qosymsha aqparat joq», — dedi kompanıa ókili juma kúni.