Qazaqstannyń birneshe óńirinde orman órtteri tutanyp jatyr. Ekologıa jáne tabıǵı resýrstar mınıstrligi men Tótenshe jaǵdaılar mınıstrligi (TJM) áýeden túsirilgen foto jáne vıdeolardy jarıalap, apattyń aýqymyn kórsetti, dep habarlaıdy infohub.kz.
Ekologıa mınıstrliginiń málimetinshe, 16 shildede órtti sóndirýge 600-ge jýyq adam, 148 birlik jerústi tehnıkasy jáne 7 tikushaq jumyldyryldy. Áýeden 123 ret sý tógilip, oshaqtarǵa 157 tonna sý jetkizildi. Oqıǵa ornyna Ekologıa mınıstri Erlan Nysanbaev pen Tótenshe jaǵdaılar mınıstri Shyńǵys Árinov baryp, kúshter men quraldardyń is-qımylyn úılestirýde.
Memlekettik orman qory aýmaǵynda barlyǵy 10 orman órti tirkeldi: onyń 4-i «Semeı ormany» memlekettik orman tabıǵı rezervatynda, 6-y «Ertis ormany» rezervatynda. «Ertis ormanyndaǵy» órtterdiń kópshiligi naızaǵaı razrádtarynan paıda bolǵan. Qazir aýmaqtardy tekserý, órtterdi oqshaýlaý jáne tolyq joıý jumystary júrgizilýde.
Ekologıa mınıstrliginde anomaldy ystyq jáne qurǵaq aýa raıyna baılanysty órt qaýpi deńgeıi óte joǵary ekenin, barlyq qyzmetter kúsheıtilgen jumys rejımine kóshirilgenin atap ótti. Jaǵdaı turaqty baqylaýda.
TJM órtterdi jerústi kúshteri men avıasıany tarta otyryp joıý jalǵasyp jatqanyn, eldi mekenderdi qorǵaý úshin barlyq qajetti sharalar qabyldanyp jatqanyn habarlady. Mınıstr Shyńǵys Árinov, mınıstr Erlan Nysanbaev jáne Abaı oblysynyń ákimi Berik Ýálı «Semeı ormanyndaǵy» eń kúrdeli órt oshaqtaryn aralap shyǵyp, jedel shtab quryldy. Órtti oqshaýlaý túngi ýaqytta da jalǵasýda.
Qarańǵy túsken soń sý quıý qurylǵylarymen avıasıalyq jumystar ýaqytsha toqtatyldy. Órt ornynda jańbyr jaýyp, túngi jaýyn-shashyn kútilýde.
Buǵan deıin orman órti saldarynan «DosbolLike» lagerinen 190 bala jáne 20 qyzmetker evakýasıalanǵan edi. Premer-mınıstr Oljas Bektenov tótenshe jaǵdaı ornyna mınıstrlerdi shuǵyl jiberdi.