Ótken táýlikte Qazaqstannyń memlekettik orman qory aýmaǵynda 13 órt tirkeldi. Tilsiz jaýdyń kópshiligin áýe patrúldeý jáne erte anyqtaý júıesiniń arqasynda tapty, dep habarlaıdy infohub.kz.
Shyǵys Qazaqstan oblysynda eki órt boldy. Qaraǵandy oblysynda, «Marqakól» jáne «Qorǵaljyn» memlekettik tabıǵı qoryqtarynda, «Baıanaýyl» ulttyq parkinde, sondaı-aq «Jasyl aımaq» RMK aýmaǵynda bir-birden órt tirkeldi.
«Qarqaraly» ulttyq parkinde jáne «Ertis ormany» men «Semeı ormany» memlekettik orman tabıǵı rezervattarynda taǵy eki-ekiden órt tirkeldi.
Habarlamalar túskennen keıin órt oryndaryna orman mekemeleriniń qyzmetkerleri jiberildi. Sóndirýge «Qazavıaormanqorǵaý» tikushaǵy Mı-8 sý quıatyn qurylǵymen, avıasıalyq órt sóndirý qyzmeti jáne memlekettik orman qorǵaý bólimsheleri jumyldyryldy.
Keıbir aımaqtarda qalǵan órt oshaqtaryn joıý jalǵasýda.
Ystyq pen naızaǵaıly maıdandardyń ótýine baılanysty Qazaqstanda órt qaýpiniń joǵary deńgeıi saqtalýda. Memlekettik orman qorǵaý jáne «Qazavıaormanqorǵaý» orman qoryn áýe jáne jer ústi patrúldeýdi kúsheıtilgen rejımde jalǵastyrýda.
Aldyńǵy kúni tek Aqmola oblysynda ǵana táýlik ishinde jalpy aýdany 230 gektardan asatyn qurǵaq ósimdikterdiń toǵyz órt oshaǵy joıyldy. Órtter Atbasar, Aqkól, Selınograd, Jaqsy jáne Qorǵaljyn aýdandarynda boldy. Sóndirýge TJD bólimsheleri, «Qazavıaqutqarý», jergilikti atqarýshy organdar, orman mekemeleri jáne basqa da qyzmetter tartyldy.