AQSh pen Iran arasyndaǵy qaqtyǵys Dýbaı bıligin Ormýz buǵazyn aınalyp ótetin balama jol izdeýge májbúr etti. Port operatory DP World Birikken Arab Ámirlikteriniń shyǵys jaǵalaýynda jańa port salýdy josparlap otyr. Bul kemelerge Oman shyǵanaǵynan tikeleı elge kirýge múmkindik beredi, dep habarlaıdy infohub.kz.
Financial Times dereginshe, Dýbaıdyń basty porty Jebel-Álıdiń belsendiligi Ormýz buǵazy arqyly keme qatynasyndaǵy qıyndyqtar saldarynan 90–95% tómendegen. Endi DP World BAÁ-niń shyǵys jaǵalaýynda, atap aıtqanda Fýdjeıra ámirliginde jańa kópfýnksıonaldy port pen konteıner termınalyn salýdy qarastyrýda. Fýdjeıra Oman shyǵanaǵyna shyǵa alady jáne Ormýz buǵazynan tys ornalasqan. Jańa baǵyt kemelerge qaýipti aımaqty aınalyp, Ámirlikter porttaryna jetýge múmkindik beredi.
Jobanyń mańyzdy bir ereksheligi bar. Jańa port BAÁ-de ornalasady, biraq Dýbaı ámirliginen tys jerde. Financial Times atap ótkendeı, mundaı qadam ýaqyt óte Dýbaıdiń aımaqtaǵy basty logıstıkalyq ortalyq retindegi rólin ózgertýi múmkin. Daǵdarys aıasynda ózge de aımaq elderi balama joldar izdeýde. Saýd Arabıasy, Irak jáne Kýveıt problemaly teńiz jolyn aınalyp ótetin eksport pen tasymaldaý nusqalaryn pysyqtaýda.
AQSh budan buryn Iran porttaryn qaıta qorshaýǵa alǵan jáne Iranǵa jańa soqqylar bergen edi. Tegeran jaýap retinde aımaqtaǵy amerıkandyq áskerı nysandarǵa shabýyl jasady. Soǵys qımyldary saldarynan Ormýz buǵazy arqyly komersıalyq kemelerdiń júrýi azaıyp, bul tasymaldaýda úzilisterge jáne munaı baǵasynyń ósýine ákeldi. AQSh prezıdenti Donald Tramp Ormýz arqyly júk tasymalynan 20 paıyzdyq alym alý ıdeıasynan bas tartyp, onyń ornyna Parsy shyǵanaǵy elderimen saýda-ınvestısıalyq kelisimderge súıenýdi kózdep otyr.