Abaı oblysyndaǵy «Semeı ormany» memlekettik orman tabıǵı rezervatynyń Borodýlıha fılıalynyń aýmaǵynda iri orman órti boldy, dep habarlaıdy infohub.kz saıty.
Óńirdegi orman órtiniń joǵary qaýpin eskere otyryp, órt sóndirýge jedel túrde aýqymdy kúshter jumyldyryldy. Kúrdeli jer bederi men orman aımaǵynyń ereksheligi áýe kemelerin dereý qoldanýdy talap etti. Jalyndy sóndirýge Tótenshe jaǵdaılar mınıstrliginiń, Qorǵanys mınıstrliginiń jáne Ulttyq qaýipsizdik komıtetiniń avıasıasy jumyldyryldy.
«Órtpen kúresý úshin jumyldyrylǵan tikushaqtar jalpy kólemi 15 tonna sýdy tógip úlgerdi, bul órt oshaqtaryn oqshaýlaýǵa yqpal etedi», — dep habarlady TJM baspasóz qyzmeti. TJM jedel shtaby barlyq qyzmetterdiń is-qımylyn úılestirip otyr, joıý jumystary jalǵasýda, jaǵdaı turaqty baqylaýda.
Qaýipsizdikti qamtamasyz etý maqsatynda órt oshaǵyna jaqyn ornalasqan balalar saýyqtyrý lagerinen 190 bala jáne 20 eresek adam evakýasıalandy. «Jaǵdaı turaqty baqylaýda, eldi mekender men tirshilikti qamtamasyz etý nysandaryna qaýip joq», — dep habarlady Borodýlıha aýdany ákimdiginiń baspasóz qyzmeti.
Buǵan deıin, 2023 jyldyń maýsym aıynyń basynda «Semeı ormany» tabıǵı rezervatynda 15 ormanshynyń ómirin qıǵan iri orman órti bolǵan edi. 2026 jyldyń maýsym aıynyń basynda úkimettegi brıfıńte jýrnalıser vıse-mınıstr Núrken Shárbıevten vedomstvonyń bolashaqta osyndaı qaıǵyly oqıǵalardyń aldyn alý úshin qandaı sharalar qabyldaǵanyn, sondaı-aq jumysshylardyń jalaqysy qanshalyqty óskenin jáne arnaıy tehnıkanyń jańartylǵanyn surady.