Ortalyq saılaý komısıasy (OSK) «Qazaqstan Halyq partıasy» qoǵamdyq birlestiginiń partıalyq tizimin 23 tamyzda ótetin Quryltaı depýtattary saılaýyna tirkedi. Bul týraly infohub.kz habarlaıdy.
Partıa tizimdi usyný qujattaryn 9 shildede OSK-ǵa tapsyrdy. Kandıdattardyń Konstıtýsıa jáne Saılaý týraly konstıtýsıalyq zań talaptaryna sáıkestigi tekserilgennen keıin komısıa tirkeý týraly sheshim qabyldady.
OSK múshesi Ásel Jańabılovanyń aıtýynsha, partıalyq tizimge 72 kandıdat engen, onyń ishinde 30-y – áıelder, jastar jáne múgedektigi bar adamdar. Olardyń úlesi 41,7% quraıdy, bul zańnamada belgilengen kvotaǵa sáıkes keledi.
«Ortalyq saılaý komısıasy ýákiletti memlekettik organdarǵa jibergen suraýlarǵa sáıkes, partıalyq tizimge engizilgen adamdardyń Konstıtýsıa jáne Saılaý týraly konstıtýsıalyq zań talaptaryna sáıkestigi tekserildi. Partıalyq tizimge engizilgen barlyq adam qoıylatyn talaptarǵa jaýap beredi», — dep atap ótti Ásel Jańabılova.
Sondaı-aq ol 2023 jylǵy májilis depýtattary saılaýynyń qorytyndysy boıynsha Qazaqstan Halyq partıasy 5%-dan astam daýys jınaǵanyn, sondyqtan zańǵa sáıkes saılaý jarnasyn tóleýden bosatylǵanyn eske saldy.
Qajetti qujattarǵa qol qoıylǵannan keıin Ortalyq saılaý komısıasy partıalyq tizimdi tirkeý týraly qaýly qabyldady. Tirkelgen kandıdattarǵa tıisti kýálikter tabystaldy.