Óskemende iri alaıaqtyq áshkerelendi: jergilikti turǵyn memlekettik baǵdarlama boıynsha turǵyn úı satyp alýǵa kómektesemin dep 25 adamdy 186 mln teńgeden astam somaǵa aldaǵan. Belgili bolǵandaı, kúdikti páterdi jaldap alyp, ony satyp alýshylardyń bolashaq baspanasy retinde kórsetken, dep habarlaıdy infohub.kz.
Shyǵys Qazaqstan oblysy polısıa departamenti baspasóz qyzmetiniń málimetinshe, 30 jastaǵy er adam 2024 jyldyń qarashasynan 2026 jyldyń sáýirine deıin azamattardy aqshany qolma-qol nemese banktik shotqa aýdarý arqyly berýge kóndirgen. Ol páterlerdi tıimdi baǵamen usynyp, qujattardy rásimdeýdiń barlyq máselesin óz moınyna alatynyn ýáde etken.
Aqshany alǵannan keıin jańa shyǵyndar paıda bolǵan: turǵyn úıdi tirkeý, qujattardy rásimdeý jáne basqa da tólemder. Mámileniń shynaıylyǵyna sendirý úshin er adam páterdi jaldap alyp, ony satyp alýshylardyń bolashaq baspanasy retinde kórsetken. Adamdar jaqyn arada kiltterin alamyz dep senip, aqsha bere bergen.
Alaıda olar ýáde etilgen baspana men qujattardy eshqashan ala almaǵan. Kúdiktiniń áreketinen Shyǵys Qazaqstan oblysynyń 25 turǵyny zardap shekken, al jalpy shyǵyn 186 445 000 teńgeni quraǵan.
Kúdikti ustalyp, polısıaǵa jetkizilgen. Qazir ol ýaqytsha ustaý ızolátorynda otyr. Jaýap alý kezinde er adam kinásin moıyndaǵan.