Óskemendegi turǵyn úılerdiń biriniń aýlasynda 5518 áskerı bóliminiń merzimdi qyzmettegi sarbazdary quramy belgisiz untaq tárizdi zat salynǵan 60-qa jýyq túıinshekti tapty, dep habarlaıdy infohub.kz saıty.
NUR.KZ-tiń Ulttyq ulanǵa silteme jasap habarlaýynsha, kúdikti zatty ulandyqtar qala kóshelerindegi patrúldeý kezinde baıqaǵan. Sodan keıin taǵy da ondaǵan osyndaı túıinshek tabylǵan.
«Patrúldeý kezinde biz aýmaqty, sonyń ishinde qarańǵy jáne jasyryn jerlerdi muqıat tekseremiz. Qalyń aǵashtardyń qasynan ótip bara jatyp, kúdikti zatty baıqadym. Syrtqy túrine qarap, ishinde esirtkige uqsas zat bolýy múmkin dep oıladym. Dereý áskerı narád bastyǵyna baıandadym, sodan keıin oqıǵa ornyna tergeý-jedel toby shaqyryldy», — dedi qatardaǵy D. Hasenov.
Aıta keteıik, ulandyqtar barlyǵy 60-qa jýyq túıinshek tapqan. Olar qyzyl, kók jáne qara tústi ızolentamen oralǵan.
«Tabylǵan túıinshekter alynyp, saraptamaǵa jiberildi. Mamandar olardyń naqty quramyn anyqtap, zattyń túrin aıqyndaýy kerek», — delingen Ulttyq ulan habarlamasynda.