Óskemende Ertis ózeni arqyly jańa kópir salý jumystary bastaldy. Ol úshin Serikbaev kóshesin aınalma joldan bastap salý kózdelgen. Jańa nysan qalanyń negizgi magıstralderindegi kólik júktemesin azaıtyp, ózen ekige bólip turǵan aýdandar arasyndaǵy qatynasty jaqsartady, dep habarlaıdy infohub.kz saıty.
Shyǵys Qazaqstan oblysynyń ákimi Nurymbet Saqtaǵanovtyń aıtýynsha, búginde Óskemende 140 myńǵa jýyq kólik tirkelgen. Óńirlik bıliktiń boljamynsha, aldaǵy 5 jylda olardyń sany 200 myńnan asýy múmkin. Osyndaı ósim kezinde Qazaqstan kóshesi baǵytyndaǵy qazirgi ınfraqurylym jaıly qozǵalysqa jetkiliksiz bolady.
Jańa kópirdiń ótkizý qabileti táýligine 80 myńǵa deıin kólikti quraıdy.
«Eń bastysy – turǵyndarǵa qolaıly bolýy, keptelissiz tez ári qaýipsiz jetý múmkindigi», – dep atap ótti Nurymbet Saqtaǵanov.
Nysannyń pasportyna sáıkes, qurylys 2026-2029 jyldarǵa josparlanǵan. Joba uzyndyǵy 2,264 km avtomobıl jolyn, uzyndyǵy 834,8 m Ertis arqyly ótetin kópirdi jáne uzyndyǵy 42,2 m tarmaq arqyly ótetin kópirdi qamtıdy.
Kópirde 6 jolaq qarastyrylǵan. Júris bóliginiń eni 26 m bolady. Ár baǵytta eni 3,5 m 2 jolaqtan, al shetki eni 4 m jolaqtar qoǵamdyq kólikke arnalady. Joldyń eki jaǵynda eni 2,25 m trotýarlar, sondaı-aq eni 1,5 m velosıped joly salynady.
Kópir sol jaǵalaý jaǵynan monolıtti aralyq qurylymdary bar bolat-temirbetonnan jasalady. Kireberisterde jumsaq kirý plıtalary qarastyrylǵan.
Elektr jelilerine qatysty jeke jumystar kesheni bar. Merdiger joǵary vóltty jeliler men 7 aýyr dińgekti júris bóliginen 26-31 m qashyqtyqqa ornalastyrýy kerek. Sonymen qatar, 70 km symdy aýystyrý josparlanýda.
Oblys ákimi qurylystyń sapasy men merziminiń saqtalýyn tıisti organdar qadaǵalaıtynyn atap ótti.
Óńir basshysy kólik ınfraqurylymyn damytýdy Shyǵys Qazaqstannyń týrısik áleýetimen de baılanystyrdy. Onyń aıtýynsha, Qazaqstan prezıdenti Qasym-Jomart Toqaev týrızmdi damytýǵa erekshe kóńil bólýdi tapsyrǵan. Ol úshin zamanaýı joldar, kópirler jáne basqa da ınfraqurylym qajet.
Jańa kópir qurylysymen qatar, oblysta týrısik salany damytýǵa baǵyttalǵan basqa da jobalar júzege asyrylýda. Jańa kópir qoldanystaǵy baǵyttardaǵy kólik júktemesin azaıtyp, jol ýaqytyn qysqartyp, qozǵalys qaýipsizdigin arttyrýy tıis.