Oqýdaǵy máselelerdi sheshkisi kelgen 22 jastaǵy óskemendik qyz úlken qarjylyq shyǵynǵa ushyrady: beıtanys adamǵa senip, 1,7 mln teńgesinen aıyryldy, dep habarlaıdy infohub.kz saıty.
Shyǵys Qazaqstan oblysy polısıa departamentiniń baspasóz qyzmetiniń málimetinshe, qyz alaıaqtyq týraly aryzben polısıaǵa júgingen. Ol buǵan deıin akademıalyq qaryzyn jabýǵa jáne qajetti qujattardy rásimdeýge kómektesýdi usynǵan er adammen tanysqanyn aıtqan. Senimge kirgen alaıaq túrli syltaýlarmen jábirlenýshini rassrochka men nesıe rásimdeýge kóndirip, alǵan aqshany ózine tıesili shottarǵa aýdaryp otyrǵan.
Osy zańsyz áreketterdiń saldarynan qyzǵa 1,7 mln teńge kóleminde materıaldyq zalal keltirilgen. Óskemen qalalyq polısıa basqarmasynyń kıberqylmysqa qarsy kúres tobynyń qyzmetkerleri kúdiktini anyqtaǵan. Ol oblys ortalyǵynyń 20 jastaǵy turǵyny bolyp shyqty. Osy fakti boıynsha alaıaqtyq belgileri boıynsha sotqa deıingi tergeý júrgizilýde.