Өскеменде ерекше жол-көлік оқиғасы болды: көлік бағанға соғылды, тұрақта тұрған машинаны сырып кетті, ғибадатхана қақпасына да кіріп кете жаздады. Жүргізушінің біртүрлі әрекеті түсірілген бейнежазба әлеуметтік желілерде тарап, қолданушылар рөлде отырған ер адам мас болған деп болжады, деп хабарлайды infohub.kz сайты.
Шығыс Қазақстан облысы полиция департаментінің нақтылауынша, оқиға 22 қазанда Островский көшесіндегі үйлердің бірінің ауласында тіркелген. Алдын ала деректерге сәйкес, Toyota Town Ace көлігінің жүргізушісі тұрақта тұрған Nissan Sunny-ге соғылған. Оған қатысты Қазақстан Республикасы Әкімшілік құқық бұзушылық туралы кодексінің 610-бабының 1-бөлігімен — көлік құралын зақымдап, материалдық шығын келтірген жол жүрісі қағидаларын бұзу бойынша әкімшілік хаттама толтырылған.
Ведомствоның баспасөз қызметі нарколог дәрігердің қорытындысына сәйкес алкогольдік және есірткілік масаңдық анықталмағанын түсіндірді. Сонымен қатар жүргізуші жүрек-қан тамырлары ауруы бар екенін және дәрі-дәрмек қабылдап жүргенін айтқан. Дәрілердің оның жағдайына ықтимал әсерін анықтау үшін қосымша зертханалық сараптама тағайындалды.
Коммуналдық қызмет өкілдерінің тексеруі бойынша баған мен құбырдың зақымданғаны анықталмады. Түпкілікті құқықтық баға медициналық сараптама нәтижелері ескеріле отырып беріледі. Негіз болса, жүргізушінің әрекетіне қосымша құқықтық баға беріледі.