Astanada mindetti áleýmettik medısınalyq saqtandyrý júıesiniń búdjet qarajatyn jymqyrý isi boıynsha sot úkimi shyqty. Tergeýdi Astana qalasy boıynsha Qarjylyq monıtorıń agenttiginiń departamenti júrgizgen, dep habarlaıdy infohub.kz saıty.
Anyqtalǵandaı, «Forte Clinic (Tumar)» jeke klınıkasynyń basshysy medısınalyq mekemege tirkelgen azamattar sanyn jasandy kóbeıtý arqyly Áleýmettik medısınalyq saqtandyrý qorynan negizsiz qarjylandyrý alý sqemasyn uıymdastyrǵan. Ol sqemany iske asyrýǵa «Densaýlyq saqtaýdy damytýdyń ulttyq ǵylymı ortalyǵy» SHJQ RMK qyzmetkerin tartqan. Qyzmetker qyzmettik kirý múmkindigin paıdalanyp, pasıentterdi tirkeýge arnalǵan jalǵan ótinimderdi zańsyz maquldaǵan.
Osylaısha, klınıkaǵa 15 myńnan astam azamat jazbasha ótinish boıynsha tirkelgen, alaıda qoldanystaǵy erejeler mundaı nysandy tek shekteýli adamdar tobyna ǵana ruqsat etedi. Sondaı-aq basqa óńirlerdiń turǵyndaryn, zańdy ókilderiniń qujaty joq kámeletke tolmaǵandardy jáne Qazaqstannan tys jerde júrgen azamattardy tirkeý faktileri anyqtalǵan.
Budan bólek, klınıka basshysy Damu Med aqparattyq júıesindegi medısına qyzmetkerleriniń eseptik jazbalaryn baqylaýǵa alyp, olardy mekeme ákimshiliginiń telefon nómirlerine baılaǵan. Ol osy kirý múmkindigin paıdalanyp, zańsyz tirkelgen azamattarǵa kórsetilgen medısınalyq qyzmetter týraly jalǵan málimetter engizgen, bul qordan qarjylandyrý alýǵa negiz bolǵan.
Memleketke keltirilgen zalal 79 mıllıon teńgeden asqan. Sot aıyptalýshylardy kináli dep tanyp, klınıka basshysyn bes jylǵa, al Ulttyq ǵylymı ortalyq qyzmetkerin úsh jylǵa bas bostandyǵynan aıyrdy. Qarjylyq monıtorıń agenttiginde zalal tolyq kólemde ótelgenin habarlady. Úkim zańdy kúshine engen.