Ótirik óleń aıttym da, qyzǵa jaqtym,
Kumyrsqanyń asaýyn qoıdaı baqtym.
Asaýyn shegirtkeniń ustap minip,
Taý-taýdan tarbańdatyp túlki qaqtym.
Bir qoıanǵa mindim de, aspanǵa ushtym,
Ekpinine shydamaı, jerge tústim.
Alty kúndeı aq boran soǵyp edi,
Jalǵyz qýraı túbine as qyp ishtim.
Dúnıede aýyr eken úrgen qaryn,
Jalǵyz ózim kóterdim sonyń bárin.
Atandarǵa úsh tóstep artyp edim,
Kótere almaı, jyǵyldy, janýarym !
Bul dúnıede bek aýyr úrgen qýyq,
Jalǵyz ózim kóterdim aýzyn býyp.
Qara shirkeı shybynǵa arba saldym,
Ondaı myqty kórmedim ózim týyp.
Bir qarsaqty jaratyp, bazar mindim,
Qulaǵynan berik basyp ázer mindim
Eki hambal ústine teńdep alyp,
Qara joldyń ústinde bort-bort jeldim.
Bazarǵa baraıyn dep, borsyq mindim,
Ózim jaıaý bolǵan soń, qorqyp mindim.
Eki hambal astyma mata teńdep,
Qara joldyń ústinde bort-bort jeldim.
Torǵaıdyń atym úrikti qý basynan,
Tyshqanynyń arkan estim shýdasynan.
Otyz kisi bir qanshyr ustap alyp,
Astaý-astaý et jedik er basynan.
Masa degen bir ádil pakyr eken,
Imansyz sona degen kápir eken.
Úıine ıneliktiń kirip barsam,
As berip ákesine jatyr eken.
Túbinen jaý qıaqtyń erdiń basy,
Kónekteı kóbelektiń jumyrtqasy.
Bazardan ózim baryp alyp keldim,
Qanshyrdyń shańyraqtaı omyrtqasy.
Ótirik óleń aıtsam da, kelisi bar
Sary masanyń sabalyq terisi bar.
Bógelektiń bıesin baılaımyn dep,
Órmekshiniń on qulash jelisi bar.
Mindim de ınelikti, sona qýdym,
Sonany úsh kún, úsh tún qona qýdym.
Tós etine sonanyń jerik bolyp,
Tiline sol jeńgemniń bola qýdym.
Kep masa qý kádege qut quıypty ,
Kóbelek: «Daýlymyn!» - dep, jurt jıypty.
«Ol daýyna men ózim bolmaımyn!» - dep,
Kólbaqa sýda jatyp, tyrbıypty.

---