Bıologtar ystyq bulaqtarda tirshilik ete alatyn eýkarıottyq organızm tapty. Bul ǵylymnyń tirshilik ortasy týraly túsinigin ózgertedi, dep habarlaıdy infohub.kz saıty.
Amebanyń jańa túri Incendiamoeba cascadensis dep ataldy, ol «otty ameba» degen atpen de belgili. Bul mıkroorganızm kúrdeli eýkarıottyq organızmder arasynda termotózimdilik rekordyn jańartty. Úlgiler Kalıfornıa shtatyndaǵy Lassen-Volkanık ulttyq parkiniń ystyq geotermaldyq bulaqtarynan jınalǵan.
NASA granty qoldaǵan bul jańalyq «Cell» ǵylymı jýrnalynda jarıalandy. Buryn eýkarıottardyń kúrdeli jasýshalary asa joǵary temperatýrada kóbeıip, belsendi jumys isteı almaıdy dep eseptelgen. Alaıda tabylǵan ameba 57–63 gradýs Selsıde tirshiligin saqtap, bólinedi, sondaı-aq joǵaryraq temperatýradaǵy qysqa merzimdi qyzýdy da kóteredi.
Sırakýz ýnıversıtetiniń zertteýshileri, atap aıtqanda Berıl Rappaport pen Andjela Olıverıo, bul derekter kúrdeli organıkalyq tirshiliktiń tózimdilik shegi ǵylym oılaǵannan áldeqaıda keń ekenin dáleldeıdi deıdi.
Jańalyq astrobıologıa men jerden tys órkenıetterdi nemese mıkroorganızmderdi izdeý úshin mańyzdy. Osyndaı ekstremofılder eýkarıottyq tirshilik buryn kúrdeli tirshilik formalaryna jaramsyz dep sanalǵan, geotermaldyq belsendiligi joǵary ystyq ekzoplanetalar men sý álemderinde de bolýy múmkin ekenin kórsetedi.