Ózbekstanda on tórt jasqa tolmaǵan balalardy zorlaǵany úshin ómir boıy bas bostandyǵynan aıyrý jazasyn engizý usynyldy. Tıisti zańnamalyq túzetýlerdi Ózbekstan Olı Májilisiniń Zańnama palatasy birinshi oqylymda qabyldady, dep habarlaıdy infohub.kz saıty.
NUR.KZ-tiń Ózbekstan Olı Májilisiniń Zańnama palatasyna silteme jasap habarlaýynsha, zań jobasy balalarǵa qarsy jasalǵan jekelegen asa aýyr jynystyq qylmystar úshin ómir boıy bas bostandyǵynan aıyrýdy kózdeıdi.
«Sondaı-aq zań jobasynda balalarǵa qatysty jynystyq zorlyq-zombylyq pen qol suǵýshylyq úshin jaza sharalaryn qatańdatýǵa, zorlyq-zombylyq qurbandary bolǵan kámeletke tolmaǵandardyń quqyqtyq qorǵalýyn kúsheıtýge, osyndaı jaǵdaılardyń aldyn alýǵa, sondaı-aq tıisti uıymdar men laýazymdy tulǵalardyń jaýapkershiligin arttyrýǵa baǵyttalǵan normalar kórinis tapqan», — delingen Zańnama palatasynyń habarlamasynda.
Qujattyń jekelegen erejeleri asa aýyr jynystyq qylmystarǵa qatysty. Olar úshin uzaq merzimge bas bostandyǵynan aıyrý ne ómir boıy bas bostandyǵynan aıyrý belgileý usynylyp otyr.
«Eń aldymen balalarǵa qatysty jasalǵan asa aýyr jynystyq qylmystar úshin jazany túbegeıli qatańdatý usynylady. Atap aıtqanda, on tórt jasqa tolmaǵan adamdy zorlaǵany nemese jynystyq qajettilikti tabıǵatqa jatpaıtyn nysanda kúshtep qanaǵattandyrǵany úshin uzaq merzimge bas bostandyǵynan aıyrý ne ómir boıy bas bostandyǵynan aıyrý belgileý kózdelip otyr», — delingen jarıalanymda.