25 qyrkúıekke qaraǵan tańda Ózbekstanda generasıa ajyratylýynan Qazaqstannyń Birtutas elektr energetıkalyq júıesinde irkilis boldy. Bul týraly infohub.kz saıty habarlaıdy.
Júıelik operator KEGOC dereginshe, tańǵy 05.02-de Ózbekstannyń energojúıesinde qýaty 1 516 megavatt generasıa joǵaldy. Osy irkilis Ortalyq Azıanyń Birikken energojúıesi tarapynan qýattyń kúrt artýyna ákep soqty. Saldarynan «Soltústik — Ońtústik» tranzıti kenetten bólinip ketti.
İrkilis saldarynan qazaqstandyq tutynýshylarǵa ýaqytsha shekteý qoıyldy. Respýblıka energojúıesindegi ajyratylǵan júktemeniń jalpy kólemi 962 megavatt boldy. Kompanıada apatqa qarsy avtomatıkanyń qalypty rejımde istegenin atap ótti.
Mamandar jaǵdaıdy jedel turaqtandyrdy. 05.43-te Qazaqstan energojúıesiniń ońtústik aımaǵy men Ortalyq Azıanyń Birikken energojúıesiniń paralel jumysy tolyq qalpyna keltirildi. Operator tutynýshylar úshin barlyq shekteýdi alýǵa komanda berdi.
KEGOC ulttyq kompanıasy eldiń Birtutas elektr energetıkalyq júıesiniń júıelik operatory sanalady. Kásiporyn 1996 jyly qurylǵan jáne Ulttyq elektr jelisin basqarady. Negizgi aksıoneri — 85% úlesimen «Samuryq-Qazyna» qory, qalǵan 15% aksıasy KASE jáne AIX bırjalarynda aınalymda júr.
2026 jyldyń birinshi jartyjyldyǵynyń qorytyndysy boıynsha kompanıanyń túsimi 240,1 mlrd teńgege jetip, ótken jylmen salystyrǵanda 31,1 paıyzǵa ósti. Operatordyń taza paıdasy 59,4 paıyzǵa artyp, 54,6 mlrd teńge boldy. Kásiporynnyń aktıvteri maýsym aıynyń sońynda 1,22 trln teńgege jetti.
Sońǵy aılarda qazaqstandyq energojúıe birneshe oqıǵaǵa tap boldy. Aǵymdaǵy jyldyń tamyz aıynyń ortasynda Almatyda blekaýt boldy. Keıin 25 tamyzda KEGOC jelilerindegi kezekti irkilis Shymkent munaı óńdeý zaýytyndaǵy jabdyqtyń apattyq toqtaýyna sebep boldy.