Islamabadtaǵy eń iri memlekettik aýrýhana — Pákistan medısına ǵylymdary ınstıtýtynyń perzenthana bóliminde bolǵan órt saldarynan 14 náreste qaza tapty. Bul — eldegi sońǵy jyldardaǵy eń aýyr aýrýhana órtteriniń biri, dep habarlaıdy infohub.kz saıty.
Órt sársenbi kúni tańǵy saǵattarda bastalyp, aýrýhananyń perzenthana bólimin túgeldeı sharpydy. Aýrýhana ákimshiliginiń málimdemesinde 14 náresteniń órtten qaza tapqany rastaldy. Aýrýhananyń resmı ókili, dáriger Anıza Jalıldiń Dawn gazetine aıtýynsha, sol kezde bólimde 15 náreste bolǵan, onyń bireýin dáriger qutqaryp qalǵan. Jańa bosanǵan áıelder birneshe qabat baspaldaqpen tómen túsip, ǵımarattan evakýasıalaýǵa májbúr boldy.
Densaýlyq saqtaý mınıstri Mýstafa Kamaldyń aıtýynsha, nárestelerdiń kóbi ınkýbatorda nemese ottegi apparatynda bolǵan, al ottegi balondary órttiń odan ári taralýyna sebep bolǵan. Kamal órttiń kondısıonerden shyqqanyn boljaǵanymen, tergeýshiler oqıǵa ornynda jumys istep jatyr, al bılik órttiń naqty sebebin áli rastaǵan joq. Aýrýhanada jóndeý jáne qurylys jumystary júrip jatqany belgili boldy.
Islamabad bas komısary Sohaıl Ashraftyń aıtýynsha, órt týraly dabyl tańǵy saǵat 7-ge deıin berilip, qutqarýshylar men polısıa qyzmetkerleri oqıǵa ornyna tez jetken. Aýrýhana ákimshiliginiń málimdemesinde: «Órt dereý aýyzdyqtalyp, balalar jedel túrde jansaqtaý bólimine aýystyryldy», — delingen.
Pákistan premer-mınıstri Shehbaz Sharıf bılikke oqıǵa boıynsha dereý tergeý júrgizýdi tapsyrdy. «Balalarǵa qatysty mundaı jaǵdaı orny tolmas qasiret. Kináliler anyqtalyp, olarǵa eń qatań shara qoldanylýy kerek», — dedi Sharıf. Pákistan prezıdenti Asıf Álı Zardarı nárestelerdiń otbasylaryna kóńil aıtyp, bul qazany «júrekti aýyrtatyn» dep atady.
Pákistanda zaýyttar men saýda ortalyqtary sıaqty iri ǵımarattarda órt jıi oryn alady. Buǵan qaýipsizdik erejeleriniń nasharlyǵy men qurylys normalarynyń tıisti deńgeıde saqtalmaýy sebep bolyp otyr.