Pákistannyń Dera-Ismaıl-Han qalasynda jol boıyndaǵy polısıa baqylaý-ótkizý beketiniń janynda jarylys boldy. Jergilikti polısıanyń málimetinshe, keminde 12 adam qaza taýyp, taǵy 30 adam jaraqat aldy. Bolǵan oqıǵa yqtımal terakt retinde qarastyrylýda, dep habarlaıdy infohub.kz saıty.
Polısıa bastyǵy Safdar Balochtyń aıtýynsha, qaza tapqandar men zardap shekkenderdiń kóbisi qaýipsizdik kúshteriniń qyzmetkerleri: ofıserler, keden jáne orman sharýashylyǵy basqarmasynyń qyzmetkerleri. Qaza tapqandardyń ekeýi — qarapaıym júrginshiler.
Aldyn ala boljam boıynsha, baqylaý-ótkizý beketine jarylǵysh zat tıelgen kólik soǵylǵan. Kýágerler jarylys aldynda atys dybystary estilgenin aıtady.
Ázirge eshbir top yqtımal terakt úshin jaýapkershilikti óz moınyna alǵan joq, alaıda kúdik TTP (Tehrık-ı-Talıban Pákistan) abrevıatýrasymen belgili pákistandyq talıbterge tústi.