Pákistan astanasyndaǵy iri memlekettik aýrýhananyń jańa týǵan náresteler bólimshesinde tańerteń órt shyǵyp, 14 sábı qaza tapty. Bul týraly aýrýhana ákimshiligi men úkimet habarlady. Pákistan medısına ǵylymdary ınstıtýtynyń náresteler bólimshesinde órt kezinde keminde 15 sábı bolǵan. Olardyń bireýi ǵana aman qaldy.
Qutqarýshylardyń málimetinshe, órt tańǵy 6:45 shamasynda bastalǵan. Boljam boıynsha, aýrýhananyń gınekologıa bólimshesindegi náresteler palatasynda aýa baptaǵysh qurylǵynyń kompresory jarylyp, órt tutanǵan. Órt sóndirýshiler oqıǵa ornyna tez jetip, jalyndy aýyzdyqtady. Qutqarý toptary ǵımaratty salqyndatý jumystaryn júrgizip jatyr, dep habarlaıdy jergilikti BAQ.
Aýrýhana ókili túsinikteme suraǵan qońyraýlarǵa dereý jaýap bermedi. Premer-mınıstr Shehbaz Sharıf qaza bolǵandarǵa kóńil aıtyp, oqıǵa boıynsha dereý tergeý bastaýdy tapsyrdy. Onyń keńsesi taratqan málimdemede 14 sábıdiń qaza tapqany rastaldy. «Balalarǵa qatysty bolǵan qaıǵyly oqıǵa – orny tolmas shyǵyn», – dedi Sharıf.