Pákistannyń Dera-Ismaıl-Han aýdanynda jarylǵysh zat tıelgen kólik jol boıyndaǵy polısıa beketine soǵyldy. Al Jazeera telearnasynyń dereginshe, keminde 12 adam qaza taýyp, taǵy 30 adam jaraqat aldy. Terakt 26 qyrkúıekte Haıber-Pahtýnhva provınsıasynda boldy, dep habarlaıdy infohub.kz saıty.
Jergilikti polısıa bastyǵy Safdar Balochtyń málimdeýinshe, qaza tapqandardyń arasynda polıseıler, keden jáne orman vedomstvosynyń qyzmetkerleri bar. Zardap shekkenderdi qutqarýshylar aýrýhanaǵa jetkizdi. Beket Aman-Mela eldi mekeniniń mańynda, Darazında aýdanynda ornalasqan.
Jarylystan keıin kýágerler atys dybysyn estigen. Keıinirek Associated Press agenttigi qarýly adamdar zardap shekkenderdi tasymaldaǵan jedel járdem kóligin atyp tastaǵanyn habarlady. Bir qutqarýshy qaza taýyp, taǵy ekeýi jaraqat aldy. BAQ dereginshe, shabýylǵa «Tehrık-ı-Talıban Pákistan» (TTP) qozǵalysy jaýapkershilikti óz moınyna aldy.
Bul bekette polıseılermen birge keden qyzmetkerleri de kúzette turǵan: aýdan arqyly Pákistannyń birneshe provınsıasy arasynda úlken júk aǵyny ótedi. Dera-Ismaıl-Han Ońtústik Vazırıstanǵa da jaqyn ornalasqan, onda qarýly toptar kóp jyldar boıy shabýyl jasap keledi.
Buǵan deıin «Kýrsıv» Pákistanda terrorıster jolaýshylar poıyzyn jaryp, 16 adam qaza tapqany týraly jazǵan bolatyn.