Pákistannyń soltústik-batysyndaǵy Svat aımaǵynda tártipsizdikterge qarsy ótken mıtıńide jasalǵan jarylys saldarynan keminde 14 adam qaza taýyp, taǵy 20-dan astam adam jaraqat aldy. Bul týraly infohub.kz saıty habarlaıdy.
Oqıǵa Haıber-Pahtýnhva provınsıasynyń Kabal qalasynda boldy. Polısıa bastyǵy Omar Hannyń aıtýynsha, polısıa bólimshesiniń janynda jınalǵan demonstranttar tártipsizdikterge qarsy urandar aıtyp, beıbitshilik talap etken. Sol kezde shabýylshy jarylǵysh zatty iske qosqan.
Provınsıalyq jedel járdem qyzmetiniń ókili Bılal Faızıdiń málimetinshe, jarylys kezinde qaza tapqandardyń arasynda keminde bes polısıa qyzmetkeri bar. Pákistannyń ishki ister mınıstri Mohsın Nakvı bul shabýyldy qatań aıyptap, qurbandardyń otbasylaryna kóńil aıtyp, jaraqat alǵandardyń tezirek saýyǵýyn tiledi.
Svat aımaǵy buryn ıslamdyq lańkesterdiń tiregi bolǵan. Olar qatań sharıǵat zańdaryn engizgen edi. 2007 jyly Pákistan áskeri iri operasıa júrgizip, olardy qýyp shyǵyp, úkimet baqylaýyn qalpyna keltirdi.
Ázirge eshbir top jarylysqa jaýapkershilikti óz moınyna alǵan joq. Alaıda kúdik Pákistan talıbterine, ıaǵnı Tehrık-e-Talıban Pákistan (TTP) uıymyna aýyp otyr. TTP Aýǵanstandaǵy talıbter bıliginen bólek, biraq olarmen odaqtas. Talıbter 2021 jyly Aýǵanstanda bılikke qaıta kelgennen beri TTP kóshbasshylary men jaýyngerleriniń kópshiligi sol jerden pana tapqan.
Pákistan Aýǵanstandaǵy talıbter úkimetin TTP lańkesterin jasyryp otyr dep aıyptap keledi, biraq Kabýl bul aıyptaýdy joqqa shyǵarady. Sońǵy jyldary Pákistanda, ásirese polısıa men qaýipsizdik kúshterine baǵyttalǵan lańkestik shabýyldar jıilep ketken.