Parkınson aýrýy kóp adamǵa qoldyń dirildeýimen baılanysty kórinedi. Alaıda bul aýrýdyń belgileri tek tremormen shektelmeıdi. Keıbir ózgeristerdi adam dárigerge barmaı turyp-aq baıqaýy múmkin. Vladıvostoktyq nevrolog Artem Reznıchenko áleýmettik jelilerinde úı jaǵdaıynda ózi tekserýge bolatyn úsh belgini aıtty, dep habarlaıdy infohub.kz saıty.
Birinshi belgi — qozǵalystyń baıaýlaýy. Adamnyń eki qolymen qımyldy qanshalyqty jyldam jáne birdeı jasaıtynyn tekserý kerek. Odan saýsaqtaryn jyldam búgip-jazýdy nemese qaıtalanatyn qımyldar jasaýdy suraýǵa bolady. Eger bir qol ekinshisinen aıtarlyqtaı qalyp qoısa, bul bradıkınezıanyń — qozǵalystyń baıaýlaýynyń belgisi bolýy múmkin.
Ekinshi sımptom — bulshyqet tonýsynyń joǵarylaýy, ıaǵnı rıgıdtilik, bulshyqettiń qataıyp, eriksiz qozǵalysqa qarsylyq kórsetýi. «Naýqasta baıqalatyn alǵashqy sımptomdar — tonýstyń joǵarylaýy jáne qozǵalystyń baıaýlaýy», — deıdi dáriger. Ol adam ózi aıaq-qolyn kermeı turǵanda, onyń qolyn shyntaq býynynan abaılap búgip-jazýdy usynady. Eger qozǵalys ádetten tys qatty sezilip, qol oǵan qarsylasqandaı bolsa, bul rıgıdtilikti kórsetýi múmkin. Parkınson aýrýynda mundaı qataıyp qalý qoldy, aıaqty nemese tulǵany qamtýy múmkin. Uqsas belgiler tek Parkınsonda emes, basqa da jaǵdaılarda kezdesedi.
Úshinshi belgi — tynyshtyq kúıindegi tremor, ıaǵnı aıaq-qol bosańsyp, eshqandaı qımyl jasamaı turǵanda eriksiz dirildeýi. Adamnan qoldaryn tizesine nemese basqa betke qoıyp, jaı ǵana bosańsýdy suraýǵa bolady. Parkınson aýrýynda tremor kóbinese dál tynyshtyq kúıinde paıda bolady jáne erte kezeńderde jıi denesiniń bir jaǵynan bastalady.
Alaıda mundaı test mamannyń tekserýin almastyra almaıdy: túpkilikti dıagnoz sımptomdardyń jıyntyǵy men tekserý nátıjeleri boıynsha qoıylady. Sondyqtan adam osy belgilerdiń qaısysyn baıqasa da, bul nevrologqa qaralýǵa sebep.
Buǵan deıin nevrolog Evgenıa Bahtybaeva Kursiv Health-ke dárihanadaǵy tynyshtandyrǵysh dárilerdiń nege mazasyzdyqty emdemeıtinin aıtqan bolatyn.