Armenıa premer-mınıstri qyzmetine qaıta taǵaıyndalǵan Nıkol Pashınán eldiń Eýrazıalyq ekonomıkalyq odaqqa (EAEO) jáne Eýropalyq odaqqa (EO) bir mezgilde múshe bolýy múmkin emes ekenin málimdedi, dep habarlaıdy infohub.kz.
Pashınánnyń aıtýynsha, 2025 jyly Armenıada Eýropalyq odaqqa kirý prosesin bastaý týraly zań qabyldanǵan, onyń basty maqsaty — el úshin "balama jasaý". Bul týraly ol Qyrǵyzstanda ótken Eýrazıalyq úkimetaralyq keńes otyrysynda málimdedi.
"Biz Eýrazıalyq ekonomıkalyq odaq pen Eýropalyq odaqqa bir mezgilde múshe bolý múmkin emes ekenin túsinemiz, biraq atalǵan zańnyń qabyldaný faktisiniń ózi Armenıanyń búgin EO múshesi bola alatynyn bildirmeıdi. Bolashaqta Armenıa EO-ǵa múshelikke sapaly daıyn bolǵan kezde de, bul bizdiń eldiń avtomatty túrde EO múshesi bolatynyn bildirmeıdi. Ol úshin EO-ǵa múshe memleketterdiń kelisimi jáne Armenıa azamattarynyń maquldaýy qajet bolady", — dedi Pashınán.
Ol bul máseleni aldyn ala ınstıtýsıonaldyq daıyndyq jumystarynsyz Armenıa azamattarynyń sheshimine shyǵarý múmkin emes ekenin qosty. Pashınán tipti osydan keıin de EO-ǵa resmı ótinish berý kerek ekenin, sodan keıin ǵana EO-ǵa kirýge kandıdat mártebesin alýǵa bolatynyn atap ótti.
"Atalǵan kezeńderdiń kem degende úlken bóligin ótpeıinshe, kórsetilgen másele boıynsha referendým ótkizý maǵynasyz bolady jáne biz azamattarymyzdan qazirgi ýaqytta joq suraqqa jaýap kútemiz degendi bildiredi. Bul Armenıa azamattarynyń biri joq eki balamanyń arasynda tańdaý jasaýyn kútemiz degendi bildiredi. Bul bizdiń halqymyzǵa qurmetsizdik jáne is júzinde zańsyz bolar edi. Men áriptesterime Armenıanyń ártúrli seriktestermen qarym-qatynas damytý jáne óz eli úshin saýda-ekonomıkalyq balamalar jasaý zańdy quqyǵyn moıyndaǵany úshin rızamyn. Onyń ústine, mundaı tásildi EAEO úshin paıdaly dep sanaımyn, óıtkeni yqtımal balamalardyń bolýy EAEO-nyń básekege qabilettiligi men tartymdylyǵyn damytýǵa yqpal etetin faktor bolyp tabylady. Bul turǵyda EAEO ishinde jumys isteıtin nárse bar ekenin eshkim joqqa shyǵarmaıdy dep oılaımyn. Biz daıynbyz jáne osy baǵytta jumys isteýdi usynamyz", — dep túıindedi Pashınán.
Onyń aıtýynsha, Armenıa Eýrazıalyq ekonomıkalyq odaqty shekteý keńistigi retinde qarastyrmaý kerek degen ustanymdy ustanady, al EAEO músheleriniń úshinshi eldermen ózara is-qımyly nóldik soma oıyny retinde qabyldanbaýy tıis.