Qazaqstandyqtardy Armenıa premer-mınıstri Nıkol Pashınánǵa telingen jalǵan dáıeksózdiń taralýy týraly eskertti, dep habarlaıdy infohub.kz saıty.
SK janyndaǵy dezınformasıamen kúres ortalyǵynyń málimetinshe, áleýmettik jelilerde Armenıa premer-mınıstri Nıkol Pashınánnyń Qazaqstanǵa qatysty aıtqan delingen jalǵan aqparat taralýda.
Júrgizilgen tekserý dáıeksózdiń qoldan jasalǵanyn kórsetti. Nıkol Pashınán mundaı sózder aıtpaǵan. Manıpýlásıaǵa negiz bolǵan — Armenıa úkimet basshysynyń 3 qyrkúıektegi brıfıńte jýrnalısiń suraǵyna bergen jaýaby. Erevan sheshimderine syrtqy yqpal týraly boljamdy túsindire otyryp, Nıkol Pashınán: "Aldaryńyzda Armenıa KSR Kompartıasy Ortalyq komıtetiniń birinshi hatshysy turǵandaı áser qalyptasyp otyr", — degen edi. Osylaısha, sóz tek Armenıanyń memlekettik sheshimder qabyldaýdaǵy táýelsizdigi týraly boldy. Bul kontekste Qazaqstan atalmaǵan.
Jalǵan aqparat avtorlary jekelegen sózderdi ózgertip, jaýapty túpnusqada joq tirkestermen tolyqtyrǵany atap ótiledi. Nátıjesinde málimdeme basqa maǵynaǵa ıe bolyp, Qazaqstanǵa qarsy shabýyl retinde usynylǵan. Túpnusqa jaýaptyń mazmuny brıfıńtiń jarıalanǵan beınejazbasymen rastalady. Tolyq jaýap VERELQ basylymynda keltirilgen.
Mundaı manıpýlásıalar Qazaqstan men Armenıa halyqtary arasynda jaǵymsyz kóńil-kúı qalyptastyrýǵa jáne jasandy shıelenis týdyrýǵa baǵyttalǵan, dep qosty dezınformasıamen kúres ortalyǵynda.
Qazaqstandyqtardy tekserilmegen dáıeksózder men jarıalanymdardy taratpaýǵa, alǵashqy derekkózge, kúni men málimdeme kontekstine nazar aýdarýǵa shaqyrdy. Azamattarǵa jalǵan aqparat taratqany úshin 250 AEK-ke (1 081 250 teńge) deıin aıyppul nemese ákimshilik qamaqqa alý túrindegi ákimshilik jaýapkershilik qarastyrylǵanyn eske saldy. Sonymen qatar, qoǵamdyq tártiptiń buzylý qaýpin týdyratyn nemese zańmen qorǵalatyn quqyqtar men múddelerge eleýli zıan keltiretin kórineý jalǵan aqparatty taratý 7 jylǵa deıin bas bostandyǵynan aıyrýǵa ákep soǵýy múmkin.