Reseılik advokat Vladımır Jerebenkov Telegram negizin qalaýshy Pavel Dýrovtyń kinási dáleldense, ony ómir boıyna bas bostandyǵynan aıyrý jazasyna kesýi múmkin ekenin málimdedi. Bul týraly infohub.kz saıty habarlaıdy.
Advokat Vladımır Jerebenkov TASS-qa bergen suhbatynda terorıstik áreketke járdemdesý baby boıynsha eń aýyr jaza – ómir boıyna bas bostandyǵynan aıyrý ekenin atap ótti. Sondaı-aq, tergeý barysynda Dýrovqa Reseı Qylmystyq kodeksiniń basqa baptary boıynsha da aıyp taǵylýy múmkin.
Zańgerdiń aıtýynsha, Dýrovty Reseı aýmaǵynda syrttaı qamaýǵa alýy múmkin. Mundaı rásim ekstradısıa úshin qajet: reseılik sot kúdiktini syrttaı qamaýǵa alady, sodan keıin quqyq qorǵaý organdary, onyń ishinde Interpol arqyly ony berýdi talap etedi.
Eske sala keteıik, búgin, 2026 jylǵy 29 shildede, Telegram negizin qalaýshyǵa terorızmge járdemdesý baby boıynsha aıyp taǵylǵany belgili boldy. Sáýir aıynda Dýrov shamamen 20 jyl buryn turǵan Reseıden shaqyrtý qaǵazyn alǵanyn habarlaǵan edi. 24 aqpanda reseılik BAQ-ta Dýrovqa qatysty terorıstik áreketke járdemdesý kúdigimen qylmystyq is qozǵalǵany týraly aqparat paıda boldy.
Keıin Reseı prezıdentiniń baspasóz hatshysy Dmıtrı Peskov quqyq qorǵaý organdary qajet dep sanaıtyn sharalardy qoldanyp jatqanyn jáne Telegram ákimshiligi el bıligimen yntymaqtaspaıtynyn málimdedi. Dýrovtyń ózi istiń qozǵalýyna túsinikteme berip, bılik kún saıyn reseılikterdiń Telegram-ǵa kirýin shekteý úshin jańa syltaýlar oılap taýyp, jeke ómirge qolsuqpaýshylyq jáne sóz bostandyǵy quqyǵyn basýǵa tyrysyp jatqanyn aıtty.