Pavlodarda sot alıment mólsherin ákesiniń naqty tabysyna qarap ulǵaıtty. Er adam resmı túrde 85 myń teńge jalaqy belgilegenimen, bir jylda 16 mıllıon teńge tapqany anyqtaldy, dep habarlaıdy infohub.kz saıty.
Pavlodar oblysy sottarynyń resmı Telegram-arnasynda habarlanǵandaı, kámeletke tolmaǵandar isteri jónindegi mamandandyrylǵan aýdanaralyq sot áıeldiń er adamǵa medıasıa tártibindegi daýdy retteý týraly kelisimdi buzý jáne alımentti belgilengen aqshalaı somada óndirý týraly talap aryzy boıynsha azamattyq isti qarady.
Taraptardyń kámeletke tolmaǵan qyzy bar. Buǵan deıin jaýapkerden balany asyraýǵa alıment tabysynyń 1/4 bóligi jáne (nemese) ózge de kirisi mólsherinde óndirilip kelgen. 2023 jyldyń jeltoqsanynda taraptar arasynda dál osyndaı mólsherde alıment tóleý týraly medıatıvtik kelisim de jasalǵan.
Sotqa júgingen talapker tólenip jatqan alıment somasy balany asyraýǵa jumsalatyn shyǵyndardy ótemeıtinin kórsetken. Sonymen qatar, jaýapker kásipkerlik qyzmetpen aınalysady, alaıda resmı túrde ózine 85 myń teńge jalaqy belgilegen.
Sot otyrysy barysynda jaýapkerdiń jeke kásipker retinde tirkelgeni anyqtaldy. Salyq eseptiligine sáıkes, onyń 2025 jylǵy kásipkerlik qyzmetinen túsken tabysy 16 mıllıon teńgeden asqan. Sonymen qatar, banktik shottar boıynsha aqsha qozǵalysy resmı jalaqy mólsherinen aıtarlyqtaı asyp túsken.
Sot tólenip jatqan alıment mólsheri jaýapkerdiń alǵan tabysyna sáıkes kelmeıdi, osyǵan baılanysty balanyń ata-anasynan laıyqty asyraý alý quqyǵy buzylady degen qorytyndyǵa keldi. Sondaı-aq, jaýapkerdiń kórsetiletin qyzmet kólemine baılanysty ózgermeli tabysy bar ekeni anyqtaldy.
Alıment mólsherin anyqtaý kezinde sot eń aldymen bala múddesiniń barynsha qamtamasyz etilýin basshylyqqa aldy. Alımentti tek resmı jalaqyǵa úlestik qatynasta belgileý balany asyraý deńgeıin aıtarlyqtaı nasharlatýy múmkin edi.
Nátıjesinde sot medıasıa tártibindegi daýdy retteý týraly kelisimdi buzyp, jaýapkerden kámeletke tolmaǵan balany asyraýǵa alımentti belgilengen aqshalaı somada — aı saıyn 20 AEK (2026 jyly 86 500 teńge) bala kámeletke tolǵanǵa deıin óndirdi. Talaptyń qalǵan bóligi qanaǵattandyrylmady. Sheshim zańdy kúshine endi.