Pavlodarda 15 shildede óreskel oqıǵa boldy: egde er adam men áıel bank bólimshesine petarda salynǵan tort ákelip, ol jaryldy. Zeınetkerler jeńil jaraqat aldy. Aldyn ala málimetter boıynsha, olar telefon alaıaqtarynyń nusqaýymen áreket etken, dep habarlaıdy infohub.kz saıty.
Pavlodar oblysy polısıa departamentiniń málimetinshe, zeınetkerler buǵan deıin alaıaqtardyń qurbany bolyp, jalǵan ınvestısıalyq jobalarǵa aqsha salǵan. Osy fakti boıynsha tergeý júrgizilýde, dropper rólin atqarǵan adamdar anyqtaldy. Sot arqyly urlanǵan qarajatty qaıtarý sharalary qabyldanýda.
Alaıda alaıaqtar munymen toqtamady. Olar zeınetkerlerge qaıta habarlasyp, aqshalaryn qaıtara alatyndaryn aıtty. «Psıhologıalyq áser etý ádisterin qoldanyp, olar zeınetkerlerdi tort pen petarda satyp alýǵa kóndirdi. Alaıaqtardyń nusqaýymen zeınetkerler tortqa salynǵan petardany tutatty», — dep habarlady polısıada.
Qylmystyq ister qozǵalyp, kúdiktiler izdestirilýde. Polısıa eskertedi: eger adam alaıaqtardan zardap shekken bolsa, ony qaıtadan aldaýǵa tyrysýy múmkin. Qylmyskerler aqshany qaıtarýǵa, ótemaqy nemese dıvıdend tóleýge ýáde beredi, úlken utys týraly habarlaıdy. Bul — alaıaqtyq sqemanyń jalǵasy. Ásirese egde jastaǵy adamdar psıhologıalyq qysymǵa jıi ushyraıdy.
Azamattardy úlken týystaryna eskertýge shaqyrady: bank, memlekettik organdar, quqyq qorǵaý organdary jáne ınvestısıalyq kompanıalardyń qyzmetkerleri eshqashan qaýipti áreketter jasaýdy, aqsha aýdarýdy nemese beıtanys adamdardyń telefondaǵy nusqaýlaryn oryndaýdy talap etpeıdi.