Pavlodarda quqyq qorǵaý organdarynyń qyzmetkerleri dene jaraqatyn salý qaýpimen aqsha bopsalaǵan alty kúdiktini ustady. Jábirlenýshilerge keltirilgen jalpy shyǵyn 3 mln teńgeden asty, dep habarlaıdy infohub.kz saıty.
Pavlodar oblysy polısıa departamentiniń baspasóz qyzmeti málim etkendeı, uıymdasqan qylmysqa qarsy kúres basqarmasynyń jedel qyzmetkerleri birneshe bopsalaý oqıǵasyna qatysy bar degen kúdiktiler tobynyń áreketin toqtatty.
Sotqa deıingi tergeý aıasynda úsh jábirlenýshi anyqtaldy. Aldyn ala derekter boıynsha, olarǵa keltirilgen materıaldyq shyǵynnyń jalpy mólsheri 3 mln teńgeden asady.
«Kúdiktiler bir aı boıy Pavlodar turǵyndarynan aqsha talap etip, talaptaryn dene jaraqatyn salý qaýpimen ushtastyryp otyrǵany anyqtaldy», — dedi Pavlodar oblysy polısıa departamentinde.
Júrgizilgen is-sharalardyń nátıjesinde jedel qyzmetkerler alty kúdiktiniń jeke basyn anyqtap, ustady. Olardyń beseýi ýaqytsha ustaý ızolátoryna qamaldy.
«Bopsalaý faktileri boıynsha qylmystyq ister qozǵaldy. Qazirgi tańda qajetti tergeý áreketteri júrgizilip, bolǵan oqıǵanyń barlyq mán-jaıy anyqtalýda. Sondaı-aq ustalǵandardyń basqa da osyǵan uqsas qylmystarǵa qatysy bar-joǵy tekserilýde», — dep habarlady Pavlodar oblysy polısıa departamentiniń uıymdasqan qylmysqa qarsy kúres basqarmasynyń bastyǵy Ǵabıt Qabdrahmanov.
Sonymen qatar tártip saqshylary jedel beınejazbany kórsetti. «Polısıa, jat!» — dep buıyrady arnaıy jasaq sarbazdary ustaý kezinde.