Павлодарда құрылыс бөлімінің басшысы Арман Омаров өзінің қарамағындағы қызметкерге жұмыстан шығуды ұсынып, этика кеңесінің алдына барды. Шағымды мемлекеттік қызмет істері департаментіне қызметкердің өзі берген, ол әңгіменің аудиожазбасын ұсынған, деп хабарлайды infohub.kz сайты.
Тәртіптік іс материалдарына сәйкес, қызметкермен әңгіме барысында жұмыс мәселелерін талқылағаннан кейін бөлім басшысы былай деген: «Әсем, айтыңызшы, сізді бұл жерде не ұстап тұр?», «Неге осында жабысып алып, миды қатырасыз?», «Жабысып алдыңыз... осы орынға. Мен түсінбеймін», «Сізді қанағаттандырмай ма? Барыңыз, осында неге миды қатырасыз?».
Құрылыс бөлімінің басшысы жұмыстан шығу туралы ұсынысын қызметкеріне бірнеше рет қайталап, оның өзі жұмыс істегісі келмейтінін айтқан. Әңгімеде жоғары тон мен былапыт сөздер болмаған, алайда мәселе бәрібір этика кеңесінің қарауына шығарылды.
Арман Омаров жанжалдың алдын ала болғанын ескеруді сұрады. «Неге мен "провокация" деген сөзді айттым? Себебі бұл қызметкерге хаттамамен тапсырма берілген. Ол тапсырма әдейі орындалмады, сондықтан, негізінен, осындай әңгіме болды. Сонымен қатар, бұл қызметкерге қатысты ұжымдық шағым түскен. Сол кезде жұмыс чатында осы қызметкердің әріптестеріне, тікелей басшыма, яғни маған былапыт сөздер айтқаны туралы фактілер белгілі болды. Оның ішінде менің өлімім туралы да әңгімелер болған», — деп түсіндірді Арман Омаров.
Құрылыс бөлімінің басшысы кінәсін мойындады. Этика кеңесінде Арман Омаровтың ұжымындағы атмосфера жалпы алғанда алаңдатарлық екені атап өтілді. Қала әкімінің аппараты бұған назар аударып, келіссөз үстеліне отырып, барлық әңгімелерді жұмыс бағытына бұруы қажет. Жазаға келер болсақ, шенеунікке ескерту жасау ұсынылды.