Pavlodarda 40 jastan asqan 180-nen astam turǵyn tegin elektrokardıogramma jasatyp, kardıologtyń keńesin aldy. Dúnıejúzilik júrek kúnine oraı Pavlodar oblystyq kardıoortalyǵynda ótken ashyq esik kúni densaýlyǵyn teksergisi kelgenderdiń sany buryn-sońdy bolmaǵansha kóp jınaldy, dep habarlaıdy infohub.kz saıty.
İs-shara 29 qyrkúıekte ótti. Hronika.kz basylymynyń jazýynsha, ádette kardıoortalyqtaǵy ashyq esik kúnine júzden aspaıtyn adam keletin, olardy bes dáriger tórt saǵatta qarap shyǵatyn. Bıyl barlyǵyn úlgerip tekserý úshin qosymsha maman tartýǵa jáne qosymsha kabınetterdi bosatýǵa týra keldi.
Skrınıng nátıjeleri alańdatarlyq boldy. Tekserilgenderdiń tórtten úshinen astamynda arterıalyq qysym joǵary bolyp shyqty — bul turaqty baqylaýdy qajet etetin qaýip belgisi.
Tekserilgenderdiń 12%-ynda júrek yrǵaǵynyń buzylysy anyqtaldy. Júrektiń ıshemıalyq aýrýy qatysýshylardyń 10%-ynda dıagnoz retinde qoıyldy, taǵy 10%-ynda sozylmaly júrek jetkiliksizdigi tabyldy.
Tekserý qorytyndysy boıynsha kardıologtar naýqastarǵa jeke usynymdar berdi. Keıbireýleriniń dári mólsheri túzetildi, basqalary qosymsha zertteýlerge jiberildi.
Qatysýshylardyń biri — 45 jastaǵy áıelden dárigerler júrek aqaýynan kúdiktendi. Oǵan kardıoortalyqta ehokardıografıa jasatyp, kardıohırýrgpen keńesý usynyldy.
Dárigerler arterıalyq qysymdy turaqty baqylap, profılaktıkalyq tekserýden ótip turý qajettigin eske saldy. Ásirese keýdedegi jaısyzdyq, júrektiń alyp-ushyp nemese jıi soǵýy, esten taný jáne esten tanýǵa jaqyn kúıler, sondaı-aq tynys tarylýy men bas aınalýy sıaqty belgiler baıqalsa, dereý dárigerge qaralý kerek.
Kúndelikti qandaı ádetter júrek densaýlyǵyn buzady, ony kardıolog Qarlyǵash Hahazovamen birge Kursiv Health maqalasynan oqyńyz.