Pavlodar mańynda jergilikti balyqshy kútpegen jerden ejelgi qorymdy taýyp aldy. Onda adam qańqasy men qysh ydystar bolǵan. Arheologtar munyń jasyn shamamen 4 myń jyl dep anyqtap, jerlengen adam ken óndirý jáne óńdeýmen aınalysqan sheber bolǵan dep esepteıdi, dep habarlaıdy infohub.kz saıty.
Bul tabylym ǵalymdardyń úlken qyzyǵýshylyǵyn týdyrdy. Arheologıalyq zertteýler ınstıtýtynyń qyzmetkerleri qorǵaý-qutqarý qazba jumystaryn júrgizdi. Qorymnan erte qola dáýiriniń eńbek quraldary: kvarsıt ketpender men jyltyratylǵan tas balta tabyldy.
Arheologtardyń aıtýynsha, ejelgi ýaqytta qaıtys bolǵan adamnyń qasyna onyń kásibine baılanysty zattar qoıylǵan. Bul tabylymdar jerlengen adamnyń ken óndirý jáne óńdeýmen aınalysqanyn kórsetedi.
«Biz ketpenderdi kórip otyrmyz – olar bir nárseni qazýǵa arnalǵan, usaqtaý quralyn kórip otyrmyz – mysaly, kendi usaqtaý úshin, jáne jyltyratylǵan tas baltany kórip otyrmyz. Bul adamnyń metaldy quıý jáne óńdeýmen tikeleı aınalysqanyn kórsetedi», – deıdi arheologıalyq qorlardyń bas saqtaýshysy Elena Týsheva.
Arheologtardyń sózine qaraǵanda, bul jerleý Ertis óńirinde metalýrgıa óndirisiniń paıda bolý kezeńine jatady.
Buǵan deıin Ahmet Baıtursynuly atyndaǵy Qostanaı óńirlik ýnıversıtetiniń ǵalymdary Áýlıekól aýdanynan neolıt dáýirine (b.z.d. VII–V myńjyldyq) jatatyn úsh jerleý ornyn tapqany habarlanǵan bolatyn.