Pavlodar qala turǵyndary men qonaqtaryn taǵy da tańǵaldyrdy: ákimdiktiń qoldaýymen ótken LowKZMeet aýqymdy avtofestıvali Qazaqstannyń túkpir-túkpirinen 150-den astam eksklúzıvti avtokólikti jáne ondaǵan myń kórermendi jınady. Ádette aqyly bolatyn is-sharaǵa kirý bıyl barlyq qonaqtarǵa tegin boldy, dep habarlaıdy infohub.kz saıty.
LowKZMeet Qazaqstanda on jyldan beri ótkizilip keledi. Uıymdastyrýshylardyń aıtýynsha, festıvál bastapqyda stıhıaly túrde paıda bolǵan: bári zańsyz bastalǵan, biraq ýaqyt óte kele is-shara jarqyn avtokólik shoýlaryn súıetinder úshin úlken merekege aınaldy.
«10 jyl ishinde alǵash ret avtofestıval Pavlodarda qala ákimdiginiń qoldaýymen ótip jatyr. Tipti qala ákimi Hasar Habylbekovtiń bastamasymen dep aıtar edim. İs-sharaǵa Qazaqstannyń ártúrli aımaqtarynan 150-den astam jarqyn ári eksklúzıvti kólik jınadyq. Qatysýshylar óz kólikterin, júrgizý sheberlikterin kórsetý úshin keldi. Sonyń ishinde barlyq qonaqtarǵa drıft-taksı uıymdastyrǵan kásibı drıfterler de bar», — dedi LowKZMeet avtofestıvaliniń negizin qalaýshysy ári bas uıymdastyrýshysy Darhan Iskakov.
Uıymdastyrýshylar festıváldiń birneshe maqsaty baryn atap ótedi. Eń aldymen, bul kelýshilerge arnalǵan jarqyn shoýmen úlken mereke uıymdastyrý. İs-sharaǵa halyqtyń ártúrli toptary qyzyǵýshylyq tanytady. Sonymen qatar, sportshylar munda qala kóshelerinde ereje buzbaı-aq «býyn shyǵara» alady. Júrgizý mádenıetin nasıhattaý jáne Jol qozǵalysy erejelerin saqtaý — festıváldiń basty mindetteriniń biri.
Pavlodarlyq sportshylar jyl saıyn basqa qalalardaǵy osyndaı shoýlarǵa qatysady. Pavlodarda naǵyz shoý kórsete alatyn kásibı drıfterler az emes. LowKZMeet-ke 9 jasynan beri kólik tizgindep kele jatqan 17 jastaǵy Temirlan qatysty. Jigit kórermenderdi óziniń basqarý sheberligimen tańǵaldyryp, kópshilik sıaqty BMW-de emes, «Jıgýlıde» drıft-shoý kórsetti.
«Jergilikti jarystarǵa qatysamyn: drıft, drıft-taksı, rallı, qysqy drıft — barlyǵyna qatysýǵa tyrysamyn. Ázirge júrgizýshi kýáligim joq, tek osynda arnaıy alańdarda júrýime ruqsat. Ákem meni qoldap, alyp keledi. Kólikti ózim jınadym», — dedi pavlodarlyq Temirlan Seıtkazınov.
Festıválde birneshe alań jumys istedi: sırek kezdesetin kólikter kórmesi, balalar aımaǵy, PlayStation oıyndary. Qonaqtar drıft-taksıge otyra aldy. Bul ıdeıany Pavlodar oblysynyń ákimi Asaıyn Baıhanov ta qoldady, ol da drıft-shoýda jolaýshy boldy.
«Uıymdastyrýshylarǵa, keshtiń hedlaınerleri — Omerta birlestigine, qatysýshylarǵa jáne Qazaqstannyń ártúrli qalalary men basqa elderden kelgen barlyq qonaqtarǵa rahmet. Sizder pavlodarlyqtarǵa jarqyn mereke, keremet kóńil-kúı jáne umytylmas emosıalar syıladyńyzdar», — dedi Pavlodar qalasynyń ákimi Hasar Habylbekov.
Avtofestıval aıasynda strıtbol jáne FIFA 2026 týrnırleri de ótti. İs-shara kúni boıy jalǵasyp, ondaǵan myń pavlodarlyq pen qala qonaqtaryn jınap, jazdyń eń jarqyn oqıǵalarynyń birine aınaldy.
Ádette festıvál aqyly ótedi, bılet baǵasy 8–10 myń teńgeden bastalady. Alaıda Pavlodarda bári ákimdik pen demeýshilerdiń qoldaýymen uıymdastyryldy. Merekeniń hedlaınerleri Truwer, Niman, Captown jáne Eksı boldy.