Pavlodar oblysyndaǵy Ádep keńesiniń otyrysynda Ýspen aýdany ákiminiń burynǵy orynbasaryna, jer qatynastary bóliminiń basshysyna jáne Lozov aýyldyq okrýginiń ákimine qatysty tártiptik is qaraldy. Oǵan jer ýchaskelerin berý konkýrsynda baldardy zańsyz esepteý sebep boldy, dep habarlaıdy infohub.kz saıty.
irbistv.kz málimetinshe, tergeýge tartylǵandardyń biri — buryn Ýspen aýdany ákiminiń orynbasary qyzmetin atqarǵan, qazir Pavlodar aýdanynda sol qyzmette júrgen Talǵat Beshenbaev. Onymen birge Ádep keńesinde jer qatynastary bóliminiń basshysy men Lozov aýyldyq okrýginiń ákimi jaýap berdi.
Tekserýge fermerlik sharýashylyq jetekshisiniń talap aryzy negiz bolǵan. Ol sotqa júginip, jer berý loty boıynsha básekelesterine 10 baldan zańsyz qosylǵanyn, sonyń saldarynan konkýrsta jeńilgenin dáleldedi. Jer komısıasynyń sheshimi kúshi joıylyp, prokýrorlar tártiptik is qozǵady.
«Bul konkýrsta lot boıynsha 8 qatysýshy boldy: úsheýi — zańdy tulǵalar, beseýi — jeke tulǵalar. Jeke tulǵalardyń barlyǵyna aýdan turǵyndary bolǵandyqtan 10 baldan birdeı qosyldy, alaıda sot sheshiminde aýyldyq okrýg dep kórsetilgen. Erejeler men Jer kodeksinde, tek bizdiń oblysta emes, búkil respýblıka boıynsha barlyq konkýrstarda aýdan turǵyndaryna 10 bal qosý qarastyrylǵan», — dep túsindirdi Pavlodar aýdany ákiminiń orynbasary Talǵat Beshenbaev.
Ádep keńesiniń otyrysynda maman tyńdalyp, ol jer telimin bólý kezinde basymdyq 5 jyl boıy ýchaskege tikeleı jaqyn turatyn adamǵa beriletinin túsindirdi. Sondyqtan sot sheshimi negizdi dep tanylyp, sheneýnikterdiń jalpy Ýspen aýdanynyń turǵyndaryna qosymsha bal qosýǵa quqyǵy bolmaǵan.
Barlyq sheneýnikter tártiptik isti tergeý barysynda kinásin moıyndady. Olarǵa tolyq emes qyzmettik sáıkestik túrindegi jaza taǵaıyndaý usynyldy.