Pavlodar oblysynyń mamandandyrylǵan aýdanaralyq ákimshilik soty salyq tekserýiniń nátıjesi boıynsha shyǵarylǵan habarlamany rásimdik buzýshylyqtardyń kóptigine baılanysty joıdy, dep habarlaıdy infohub.kz saıty.
Jospardan tys taqyryptyq salyq tekserýine talapkerdiń jeke kásipkermen esep aıyrysýlary negiz boldy. Osy kásipkerge qatysty salyq organy buǵan deıin elektrondyq shot-faktýralardy jazýdy shekteýdi qoldanǵan bolatyn.
Sot otyrysy barysynda tekserý júrgizý tártibiniń kóptegen buzylǵany anyqtaldy. Atap aıtqanda, sot ákimshilik rásim men tyńdaý rásiminiń tıisti emes memlekettik organmen júrgizilgenin, hattamada mindetti qoltańbalardyń bolmaǵanyn, al salyq tekserýiniń pániniń jetkilikti túrde naqty anyqtalmaǵanyn anyqtady.
Sonymen qatar, sot salyqtyq zertteýdi júrgizý jáne resimdeý tártibiniń buzylǵanyn, salyqtyq zertteý aktisiniń danalary arasynda qaıshylyqtar bar ekenin, habarlamada ártúrli salyq esepteý somalary kórsetilgenin, sondaı-aq Salyq kodeksinde belgilengen tekserý júrgizý merziminiń saqtalmaǵanyn anyqtady.
Sot jiberilgen ákimshilik rásim buzýshylyqtary qabyldanǵan ákimshilik aktiniń zańdylyǵyna áser etýi múmkin degen qorytyndyǵa keldi. Osyǵan baılanysty salyq tekserýiniń nátıjeleri týraly habarlama zańsyz dep tanylyp, joıyldy.
Sot sheshimimen ákimshilik talap qanaǵattandyryldy. Memlekettik kiristerdiń aýmaqtyq organynan talapkerdiń paıdasyna memlekettik baj salyǵyn tóleý boıynsha sot shyǵystary óndirildi. Sot aktisi zańdy kúshine endi.