Павлодар облысында сот прокуратураның талап-арызын қанағаттандырып, көппәтерлі тұрғын үйді пайдалануға беру туралы шешімнің күшін жойды, деп хабарлайды infohub.kz сайты.
Ведомствоның ресми сайтында мәлім болғандай, 2024 жылдың желтоқсанында жергілікті атқарушы орган жеке тұлғалардан 125 млн теңгеге 8 пәтерлі үйді сатып алған. Оған Аққұлы ауылының тұрғын үй кезегінде тұрған тұрғындарын қоныстандыру жоспарланған.
Нысанды аралау барысында құрылыс ақаулары мен заң бұзушылықтар анықталып, ол тұрғындардың тұруына мүмкіндік бермейді.
«Жалпы алғанда, құрылыс елді мекеннің нақты жоспарлау жобасына сай келмеген, ал жұмыстар сәулет-жоспарлау тапсырмасын алғанға дейін басталған. Нысан заң бойынша көппәтерлі тұрғын үйлерге жатқызылғандықтан, жобалау-сметалық құжаттама мен оның сараптамасы болуы талап етілген. Жобаны жүзеге асыруға авторлық және техникалық қадағалау тартылмаған, үйдің іргетасы мен негізгі құрылымдарының сапасыз салынғаны анықталды. Бұл болашақ тұрғындардың тұру сапасын айтарлықтай нашарлатуы мүмкін еді», — деді Павлодар облысының прокуратурасында.
Қадағалау органы қолданған шаралар азаматтардың осы тұрғын үйге қоныстануын болдырмауға мүмкіндік берді.
Қазіргі таңда бюджет қаражатын қайтару және кінәлі лауазымды тұлғаларды жауапкершілікке тарту жұмыстары жүргізілуде.