Pavlodarda polıseıler kezekti bir oǵash vıdeonyń avtoryn tapty. Jaıaý júrginshiler ótkelinde ish kıim, beldemshe, týflı, oramal jáne kúrteshe kıip túsirilgen beıne... dep habarlaıdy infohub.kz saıty.
Oblystyq polısıa departamentiniń habarlaýynsha, beınejazba áleýmettik jelilerdi monıtorıńteý kezinde qyzmetkerlerdiń nazaryna ilikken. Vıdeoda qyz jazǵy kıim úlgilerin joldyń júrgin bóligine jaıyp, tanymal trendti túsirýge tyrysqan.
Polıseıler jazbanyń 16 shilde kúni Pavlodar áýejaıy mańynda túsirilgenin jáne keıin Instagram paraqshasynda jarıalanǵanyn anyqtady.
«Quqyq buzýshynyń jeke basy anyqtaldy. Qyz jaıaý júrginshiler men basqa da jol qozǵalysyna qatysýshylardyń júris erejesin buzǵany úshin jaýapkershilikke tartyldy», — dep málimdedi Pavlodar oblysy Polısıa departamentinde.
Polısıa mundaı laık pen kórilim úshin túsirilgen beınejazbalar avtorlardyń ózine de, basqa jol qozǵalysyna qatysýshylarǵa da naqty qaýip tóndirýi múmkin ekenin atap ótti.
Buǵan deıin «Kýrsıv» Semeıdegi kópirde fotosessıa túsirgen áıelge aıyppul salynǵanyn jazǵan edi. Al Atyraýda polıseıler kólik qozǵalysy kezinde terezeden shyǵyp, joldasyna sýsyn quıyp bergen 37 jastaǵy jolaýshyny jaýapkershilikke tartty.