Pavlodarda 14 jyl buryn jasalǵan asa aýyr qylmys úshin 62 jastaǵy er adamǵa úkim shyǵaryldy. İsti ashýǵa DNK saraptamasy kómektesti, dep habarlaıdy infohub.kz saıty.
İs materıaldarynan belgili bolǵandaı, sot prosesi jabyq rejımde ótti. Qala shetindegi baqsha qoǵamdastyǵynda qart áıeldi qatygez óltirýdiń málimetteri jarıalanbaıdy. Anyqtalǵandaı, sottalýshy qurbanyn zorlap, sodan keıin izin jasyrý úshin ony óltirgen. Kóp jyldar boıy er adam jazasyz qaldy, alaıda krımınalısıkanyń zamanaýı ádisteri onyń izine túsýge múmkindik berdi. Qylmys ornynan tabylǵan bıologıalyq materıal sheshýshi ról atqardy, al kúdiktini DNK derekqory arqyly anyqtady.
Ustalǵan adam birden kinásin moıyndady. Aıta ketý kerek, qylmys jasaǵannan keıin ol ýaqytynyń kóp bóligin bas bostandyǵynan aıyrý oryndarynda ótkizgen: 14 jyl ishinde ol aýyr qylmystary úshin úsh ret sottalǵan. Úsh jyl buryn ol taǵy da kisi óltirý jáne urlyq úshin kolonıaǵa túsken.
Sot aıyptalýshynyń kári jasyn jeńildetetin mán-jaı retinde eskerdi, alaıda qylmysty masań kúıde jasaý aýyrlatatyn mán-jaı boldy. «Aıyptalýshynyń bul qylmystyq is boıynsha kinási jábirlenýshiniń, kýágerlerdiń aıǵaqtarymen jáne saraptama qorytyndylarymen dáleldendi. Taǵaıyndalǵan jazalardy ishinara qosý arqyly túpkilikti 20 jylǵa bas bostandyǵynan aıyrý jazasy taǵaıyndaldy», — dedi sýdıa Janna Nyǵybaeva.