Pavlodarda polısıa qyzmetkerleri alaıaqtyq sqemasyn jolyn kesip, zeınetkerge 2 mıllıon teńgesin qaıtardy, dep habarlaıdy infohub.kz saıty.
Pavlodar oblystyq polısıa departamentiniń málimetinshe, belgisiz adamdar ózderin memlekettik organ qyzmetkeri retinde tanystyryp, áıelge «bank shotyna shabýyl jasaldy» dep habarlaǵan. Olar psıhologıalyq áser etý ádisterin qoldanyp, zeınetkerdi 2 mln teńge berýge kóndirgen. Qońyraý shalǵandar zeınetkerge «tegin» taksıge otyryp, aqshasyn alyp, Gerıng kóshesindegi úıge barýdy tapsyrǵan.
«Anyqtalǵandaı, taksıdi atalǵan mekenjaıǵa belgisiz er adam shaqyrtqan. Zeınetkerge aqshany tapsyrý kezinde oǵan «Shýba» degen kodtyq sózdi aıtý kerektigi aıtylǵan. Ol belgilengen jerge kelgende, qasyna bir áıel kelip, zeınetker oǵan 2 mln teńgeni bergen. Ekeýiniń de alaıaqtyq qurbany bolǵanyn túsingen zeınetker polısıaǵa habarlasqan», – dep málimdedi departamentten.
Jedel ýákilder Bekzat Maqajanov, Abdýlı Álimbergenov jáne tergeýshi Ilá Borodanyń kásibı áreketteriniń arqasynda aqsha tolyq kólemde zańdy ıesine qaıtaryldy.
«Alaıaqtar sqemalaryn únemi jetildirip, adamdy tez ári oılanbastan áreket etýge májbúrleý úshin psıhologıalyq qysym ádisterin qoldanady. Áńgimelesý barysynda sizdi shuǵyl túrde aqsha berýge kóndirse, kodtyq sózderdi aıtsa, bolyp jatqan jaıtty týystaryńyzǵa aıtýǵa tyıym salsa, dereý sóılesýdi toqtatyńyz. Beıtanys adamdardyń nusqaýlaryn oryndamańyz jáne birden polısıaǵa habarlańyz», – dep shaqyrdy Pavlodardyń aǵa jedel ýákili Bekzat Maqajanov.