Qazaqstanda mindetti zeınetaqy jınaqtarynyń saqtalýyna memlekettik kepildik 2027 jyldan bastap kúshin joımaıdy. Ózgerister tek bir ótemaqy tóleminiń tetigine qatysty bolady, dep habarlaıdy infohub.kz saıty.
QR Eńbek jáne halyqty áleýmettik qorǵaý mınıstrligi mindetti zeınetaqy jarnalarynyń saqtalýyna memlekettik kepildik tolyq kólemde saqtalyp, Áleýmettik kodekste bekitilgenin atap ótti. Másele – jınaqtaýshy zeınetaqy júıesiniń alǵashqy kezeńinde engizilgen ótemaqy tártibin qaıta qaraý. Ol kezde zeınetaqy aktıvterin tek memleket basqardy, sondyqtan ınvestısıalyq kiristilik pen ınflásıa deńgeıi arasyndaǵy aıyrmany óteý tetigi qarastyrylǵan edi.
Eńbek mınıstrliginiń túsindirýinshe, ózgerister zeınetaqy júıesiniń damýymen jáne azamattardyń jınaqtaryn óz betinshe basqarý múmkindikteriniń keńeıýimen baılanysty. Qazirgi ýaqytta salymshylar zeınetaqy jınaqtarynyń 100 paıyzyna deıin jeke basqarýshy kompanıalarǵa senimgerlik basqarýǵa bere alady. Buryn bul kórsetkish 50 paıyzdy quraıtyn. Vedomstvonyń atap ótýinshe, basqarýshy kompanıany, ınvestısıalyq strategıany jáne táýekel deńgeıin óz betinshe tańdaý múmkindigi salymshylardyń ınvestısıalyq sheshimderdi ózderi qabyldaıtynyn bildiredi. Osyǵan baılanysty ótemaqy tólemderiniń tetigi zeınetaqy aktıvterin basqarýdyń jańa modeline sáıkestendirilýde.
Bul rette memleket zeınetaqy jınaqtaryn qorǵaýdyń qoldanystaǵy tetikterin saqtaıdy. Ulttyq bank zeınetaqy aktıvterin basqarýdy jalǵastyrady, olardyń saqtalýyna jáne uzaq merzimdi perspektıvada ınflásıadan joǵary kiristilikke qol jetkizýge baǵyttalady. Jeke basqarýshy kompanıalar úshin zańnamada qarjylyq turaqtylyqqa, menshikti kapıtal mólsherine jáne kásibı biliktilikke qoıylatyn talaptar qarastyrylǵan. Sonymen qatar, eger basqarýshy belgilengen eń tómengi kiristilik deńgeıin qamtamasyz etpese, ol aıyrmany óz qarajaty esebinen óteýge mindetti.
Mınıstrlik ózgerister jınaqtaýshy zeınetaqy júıesin jetildirýge, basqarýshy kompanıalardyń jaýapkershiligin arttyrýǵa jáne azamattardyń múmkindikterin keńeıtýge baǵyttalǵanyn, mindetti zeınetaqy jınaqtarynyń saqtalýyna memlekettik kepildikke áser etpeıtinin atap ótti.