Perýda bolǵan eki jer silkinisinen keminde alty adam qaza taýyp, jıyrma bir adam jaraqat aldy. Bul týraly infohub.kz saıty habarlaıdy.
Senbi kúni keshke Perý Ulttyq seısmologıalyq ortalyǵynyń X áleýmettik jelisindegi málimetinshe, Chýpaka provınsıasynda (Hýnın aımaǵy) magnıtýdasy 5,1 jáne 3,7 bolatyn eki dúmpý tirkelgen. Bul aımaq astana Lımadan shamamen 300 shaqyrym jerde ornalasqan.
Ortalyqtyń habarlaýynsha, birinshi jer silkinisi 24 shaqyrym, ekinshisi 18 shaqyrym tereńdikte bolǵan.
Buǵan deıin Eýropa-Jerorta teńizi seısmologıalyq ortalyǵy birinshi dúmpýdiń magnıtýdasyn 5,6 dep kórsetken edi.
Perý Ulttyq azamattyq qorǵanys ınstıtýtynyń basshysy Lýıs Vaskes Exitosa degen jergilikti radıostansıaǵa bergen suhbatynda aldyn ala málimetter boıynsha 48 úıdiń qıraǵanyn, taǵy 18 úıdiń zaqymdanǵanyn habarlady. Zardap shekken 300-ge jýyq adamǵa shatyrlar berilýde.
Chýpakadaǵy zardap shekken eldi mekenderdegi úıler, negizinen, saman kirpishterden soǵylǵan qarapaıym qurylystar ekeni aıtylady.
Vaskes jedel járdem toptary men órt sóndirýshiler jeksenbi kúni tańerteń zardap shekken aımaqtarǵa jetip, qoqystardy tazalaý jumystaryn bastaǵanyn, qosymsha qurbandardyń bolýy múmkin ekenin jetkizdi.
Perý Tynyq muhıtynyń otty sheńberi boıynda ornalasqan. Bul aımaq álemdegi seısmıkalyq belsendiliktiń shamamen 85 paıyzyn quraıdy.