Ресей, АҚШ және Украина арасындағы даулы мәселені реттеу жөніндегі үшжақты келіссөз 10–11 қарашада Біріккен Араб Әмірліктерінің астанасы Абу-Дабиде өтеді. Кездесу күнін Ресей президентінің баспасөз хатшысы Дмитрий Песков растады, деп хабарлайды infohub.kz сайты.
«Иә, бұл күнді растай аламын. Шынында да, ресейлік делегация 10–11 қарашада Абу-Дабиге келіп, үшжақты келіссөзге қатысады», — деді ол журналистерге тиісті ақпаратты растауды сұраған кезде.
Кремль өкілінен мемлекет басшысы ресейлік делегация мүшелерімен Абу-Дабиге аттанар алдында кездесуді жоспарлап отырғанын да сұрады. «Әзірге нақты айта алмаймын, нақты жоспар жоқ, бірақ жалпы алғанда ресейлік делегацияның барлық дерлік мүшелері президентке ағымдағы мәселелер бойынша тұрақты баяндап отырады және мемлекет басшысынан тиісті нұсқаулар алады», — деп жауап берді Песков.
Бұған дейін Ресей президентінің баспасөз хатшысы Дмитрий Песков АҚШ, Қытай және Ресей көшбасшыларының үшжақты кездесуіне дайындық туралы айтқан болатын. Ресей, АҚШ және Қытай үшжақты кездесу өткізу мүмкіндігіне жол беріп, онда Украинадағы жағдай талқылануы мүмкін екені хабарланған.
Украина Сыртқы істер министрлігінің басшысы Андрей Сибига Дональд Трамп, Владимир Путин және Си Цзиньпиннің ықтимал кездесуі соғысты аяқтауға көмектеспейді деп есептейді. АҚШ президенті Дональд Трамп Владимир Путин мен Си Цзиньпинмен үшжақты кездесуге дайын екенін айтып, ол Қытайда өтуі мүмкін екенін қосты.
Кейінірек Ресей президентінің көмекшісі Юрий Ушаков АҚШ, Ресей және Қытай көшбасшыларының үшжақты кездесуі қарашада Қытайдың Шэньчжэнь қаласында өтуі мүмкін екенін мәлімдеді. Сонымен қатар Біріккен Ұлттар Ұйымы Ресей, Қытай және АҚШ көшбасшыларының ықтимал кездесуін қолдады.