Soltústik Qazaqstan oblysynda qurylys jumystary kezinde eki adamnyń jáne ejelgi janýardyń súıekteri tabyldy. Sırek kezdesetin olja Petropavl mańyndaǵy Prıbrejnoe aýylynyń túbinen shyqty, dep habarlaıdy infohub.kz saıty.
Jumysshylar súıekterge kópir salý barysynda tap boldy. Ekskavator qum karerin qazyp jatqanda, topyraqtan súıekter baıqalǵan. Oljalardy jer betine shyǵaryp, oqıǵa ornyna polısıa qyzmetkerlerin shaqyrdy.
Quqyq qorǵaý organdary tekserý jumystaryn bastady. Aldyn ala málimetter boıynsha, qylmystyq sıpattaǵy belgiler anyqtalmaǵan. Alaıda adam súıekteri qaı kezeńge jatatyny ázirge belgisiz.
Tabylǵan súıekterdiń birin tarıh ǵylymdarynyń kandıdaty, arheolog Anatolı Pleshakov zerttedi. Aldyn ala boljam boıynsha, ol osy aýmaqta bizdiń dáýirimizge deıingi XII myńjyldyqqa deıin ómir súrgen júndi múıiztumsyqqa tıesili.
«Júndi múıiztumsyq — biz aıtyp júrgendeı, mamont faýnasy, ol paleolıt dáýiri, muzdyq kezeń. Eger osy bas súıekterdiń bireýi sol kezeńge jatatyn bolsa, bul asqan sensasıa bolar edi. Mamont faýnasynyń tabylýy sensasıa dep aıtyp júrsem, onda bul asqan sensasıa bolar edi. Óıtkeni bas súıekterdiń bireýi qatty zaqymdalǵan, sondyqtan bul óte qyzyq», — dedi arheolog Anatolı Pleshakov.
Endi ǵalymdar adam súıekteriniń jasyn anyqtaýy kerek. Mamandar tabylǵan súıekterdi jáne qum kareriniń ózin jan-jaqty zertteýdi josparlap otyr.