Petropavlda BMW kóligin tizgindegen júrgizýshi áýejaı aýmaǵynda drıft jasaǵany úshin ákimshilik jaýapkershilikke tartyldy. Alaıda ol kinásin moıyndamady, dep habarlaıdy infohub.kz saıty.
Soltústik Qazaqstan oblysy sottarynyń resmı Telegram-arnasynda jazylǵandaı, Petropavl qalasynyń ákimshilik quqyq buzýshylyqtar jónindegi mamandandyrylǵan soty júrgizýshige qatysty ákimshilik isti qarady.
2026 jylǵy 27 qyrkúıekte shamamen saǵat 18:00-de ol «Qyzyl-Jar» áýejaıynyń aýmaǵynda BMW kóligin basqaryp, aınalasyndaǵylarǵa qurmetsizdik tanytyp, qoǵamdyq tártip pen adamdardyń tynyshtyǵyn buza otyryp, basqarylatyn syrǵý (drıft) tásilimen burylystardy aınalǵan.
Júrgizýshi kinásin moıyndamaı, áýesqoı avtosporttan kásibı deńgeıge ótý úshin basqarylatyn syrǵý tásilimen burylystardy aınalý daǵdysyn jetildirý maqsatynda áýejaı aýmaǵyn paıdalanǵanyn túsindirdi. Drıft túsirilgen beıne estetıkalyq turǵydan ádemi kórinedi dep oılap, ony Instagram-ǵa jarıalaǵan.
İsti qaraý barysynda sot er adamnyń áreketterine jasalǵan quqyq buzýshylyqtyń sıpatyn, onyń jasalý mán-jaılaryn jáne qoldanystaǵy zańnama talaptaryn eskere otyryp, quqyqtyq baǵa berdi.
İsti qaraý qorytyndysy boıynsha sot júrgizýshini QR ÁQBtK-niń 434-babynyń 1-bóliginde kózdelgen ákimshilik quqyq buzýshylyq jasaǵany úshin kináli dep tanydy jáne oǵan 15 táýlikke qamaý túrindegi jaza taǵaıyndady.
Sot qaýlysy zańdy kúshine engen joq.