Soltústik Qazaqstan oblysynda polıseıler Petropavlǵa asa iri kólemdegi sıntetıkalyq esirtki ákelý áreketiniń jolyn kesti, dep habarlaıdy infohub.kz saıty.
İshki ister mınıstrliginiń aqparattyq medıaportalynyń málimetinshe, jedel-izdestirý is-sharalary barysynda qala aýmaǵynda 25 jastaǵy sheteldik azamat ustaldy. Tintý kezinde onyń sómkesinen krosovkalar alynyp, ishinen 250 gram sıntetıkalyq esirtki a-PvP tabylyp, tárkilendi.
Vedomstvonyń málimdeýinshe, sheteldik Qazaqstanda zańdy túrde jumys istegen — qurylysta, sondaı-aq samsa pisirýmen aınalysqan. Alaıda polısıa dereginshe, shamamen bir apta buryn ol psıhotroptyq zattardy satatyn ınternet-dúkenderdiń birine «jumysqa turǵan».
«Ustalǵan adamnyń aıtýynsha, ol sıntetıkalyq esirtkiniń partıasyn Astanadaǵy "taınıkten" alyp, Petropavlǵa jetkizip, ony qaptap, keıin "zakladkalar" arqyly taratýdy josparlaǵan», — dedi İshki ister mınıstrliginde.
Qazirgi tańda er adam qamaýda otyr. Esirtkini asa iri kólemde satý faktisi boıynsha sotqa deıingi tergeý júrgizilýde.