Astana jaǵynan Petropavlǵa kire beriste artyq júktelgen aýyr júk kólikteriniń kezegi túzildi. Salmaq baqylaýynan jáne jaýapkershilikten qutylý úshin júrgizýshiler óz kólikterin jol jıegine tastap, iz-túzsiz ketti, dep infohub.kz saıty habarlaıdy.
Soltústik Qazaqstan oblysy jolaýshylar kóligi jáne avtomobıl joldary basqarmasynyń habarlaýynsha, bul jaǵdaı avtomobıl joldaryn saqtaý jáne qaýipsiz qozǵalysty qamtamasyz etýge baǵyttalǵan «Jol qaýipsizdigi» profılaktıkalyq is-sharalary kezinde oryn alǵan.
Basqarma basshysy Erden Shortybaevtyń aıtýynsha, artyq júktelgen kólikterdiń júrgizýshileri salmaq baqylaýynan jaltarýǵa tyrysyp, óz kólikterin tastap ketken.
«Atalǵan kólikterdiń júrgizýshileri artyq júk saldarynan ólsheýden jaltarý úshin kólikterin tastap ketti. Qazirgi tańda olar eki kún boıy joq. Barlyq kólik quraldarynyń derekteri anyqtaldy», — dedi Erden Shortybaev.
Bastapqyda 28 aýyr júk kóligi týraly aıtylǵan bolatyn, alaıda keıin Soltústik Qazaqstan oblysy polısıa departamenti 32 kólik quraly ekenin naqtylady.
Ieleri eki kún boıy kólikterin alyp ketpegendikten, máseleni sheshýge polısıa qyzmetkerleri jumyldyryldy. Vedomstvonyń málimetinshe, 19 shilde saǵat 14:30-daǵy jaǵdaı boıynsha ahýal tolyq rettelgen.
Profılaktıkalyq áńgimelerden keıin barlyq 32 aýyr júk kóligi salmaq baqylaý pýnktine baryp, ólsheý rásiminen ótip, óz baǵyttary boıynsha júrip ketti. Barlyq júrgizýshilerge qatysty ýákiletti memlekettik organdar Qazaqstan Respýblıkasynyń zańnamasyna sáıkes sharalar qabyldady.
Basqarma artyq júktelgen júk kólikteri ásirese ystyq aýa raıynda jol tósemine eleýli zıan keltiretinin eske salady. Olardyń salmaǵynan jańa asfáltta oıyq paıda bolady, bul joldardyń qyzmet etý merzimin qysqartyp, olardy jóndeý shyǵyndaryn arttyrady.
Júrgizilgen ólsheýler qorytyndysy boıynsha mamandar respýblıkalyq avtomobıl jolyna keltirilgen materıaldyq zalaldy óteý týraly talap-aryzben sotqa júginýdi josparlap otyr.